ఎడతెరిపి లేకుండా కురుస్తున్న వర్షాల కారణంగా ముంపుకు గురవుతున్న లోతట్టు ప్రాంతాల పరిశీలన–జిల్లా కలెక్టర్ చదలవాడ నాగరాణి.

నగరంలో ఆక్రమణలు, ప్రభుత్వ స్థలంలోనికి చొచ్చుకు వచ్చిన నిర్మాణాల యజమానులకు నోటీసులు జారీ చేయాలి..

బివి రాజు పార్క్, ఎడ్వర్డ్ ట్యాంక్ లలో పెడలింగ్ బోట్స్ నడిపేందుకు చర్యలు చేపట్టాలి…

వీరమ్మ పార్క్ క్ ముందు వైపు తోపుడుబండ్ల దగ్గర పరిశుభ్రంగా ఉంచాలి…

బీసీ కాలేజ్ బాయ్స్ హాస్టల్ లో రన్నింగ్ వాటర్, త్రాగునీరు స్వచ్ఛంగా అందించాలి..

ఎడతెరిపి లేకుండా కురుస్తున్న వర్షాలను దృష్టిలో ఉంచుకొని నీటి పారుదలకు ఏ విధమైన ఆటంకాలు లేకుండా మున్సిపల్ సిబ్బంది ఎప్పటికప్పుడు చర్యలు చేపట్టాలని జిల్లా కలెక్టర్ చదలవాడ నాగరాణి ఆదేశించారు.

బుధవారం జిల్లా కలెక్టర్ చదలవాడ నాగరాణి భీమవరం పట్టణంలోని పలు ప్రాంతాలను ఆకస్మికంగా తనిఖీ చేశారు. ఆగకుండా కురుస్తున్న వర్షాల కారణంగా రోడ్ల మార్జిన్ లో, లోతట్టు ప్రాంతాల్లోని నీటిని మున్సిపల్ సిబ్బంది ఎప్పటికప్పుడు తొలగిపోయేందుకు చర్యలు తీసుకోవాలన్నారు. అల్పపీడం దృష్ట్యా రెండు రోజులు వర్షాలు కురిసే అవకాశం ఉందని దీని దృష్టిలో ఉంచుకొని ఎక్కడ పారిశుద్ధ్య లోపం ఏర్పడకుండా చర్యలు తీసుకోవాలన్నారు. పట్టణంలో ఆక్రమణలను గుర్తించడంతోపాటు, రోడ్డు మార్జిన్లో ప్రభుత్వ స్థలాన్ని ఆక్రమించి నిర్మాణం చేపట్టిన భవన యజమానులకు నోటీసులు జారీచేసి, తొలగించేందుకు చర్యలు తీసుకోవాలన్నారు. అనంతరం సోమేశ్వర స్వామి దేవస్థానం ముందు పారిశుద్ధ్య ఏర్పాట్లను పరిశీలించారు. కార్తీక మాసంలో దేవాలయ ప్రాంగణాలు అత్యంత పరిశుభ్రతగా ఉండేందుకు మున్సిపల్ అధికారులు చర్యలు తీసుకోవాలన్నారు. దేవాలయం ముందు రోడ్డు నిర్మించాలని, అలాగే ఎదురుగా ఉన్న చెరువులో స్పీడ్ బోట్ ను ఏర్పాటు చేయాలని సూచించారు. బివి రాజు పార్క్ పరిశీలిస్తున్న సందర్భంలో ముందువైపున ఉన్న వివిధ రకాల తినబండారాల బండ్ల వద్ద పరిశుభ్రంగా ఉంచాలని ఆదేశించారు. బండ్లకు, ప్రహరికి మధ్య ఉన్న స్థలంలో షాపులు నిర్మాణానికి పరిశీలించాలని సూచించారు. బివి రాజు పార్కులో పెడలింగ్ బోట్స్ ను శనివారం ప్రారంభించేందుకు చర్యలు తీసుకోవాలని మున్సిపల్ కమిషనర్ కు తెలిపారు. ఎడ్వర్డ్ ట్యాంక్ ను పరిశీలించిన సందర్భంలో జిమ్ ఏరియా లో నీరు నిలవకుండా డ్రయిన్ లో కలవకుండా చర్యలు తీసుకోవాలన్నారు. ఎడ్వర్డ్ ట్యాంక్ లో పెడలింగ్ బోట్స్ తిప్పటానికి ఏర్పాట్లు చేయాలన్నారు.

బుధవారం మార్కెట్ రైల్వే అండర్ పాస్ కు ఆనుకుని ఉన్న ప్రభుత్వ బిసి వెల్ఫేర్ కాలేజీ బాయ్స్ వసతి గృహాన్ని జిల్లా కలెక్టర్ ఆకస్మికంగా సందర్శించి, విద్యార్థులను మౌలిక వసతులపై ఆరా తీశారు. ఏమైనా ఇబ్బందులు ఉన్నాయా, బాగా చదువుతున్నారా, ఏ యే కోర్సులు చేస్తున్నారు అంటూ పలకరించారు. త్రాగునీటికి ఇబ్బంది ఉందని, రన్నింగ్ వాటర్ శుభ్రంగా లేవని జిల్లా కలెక్టర్ దృష్టికి తీసుకురాగా వెంటనే ఈ మున్సిపల్ అధికారులు పరిశీలించి సమస్యను పరిష్కరించాలని ఆదేశించారు. కష్టపడి చదువుకొని ఉన్నత స్థానాలకు ఎదగాలని, జీవితంలో ఒక స్థాయికి ఎదగడానికి ఇదే సరైన సమయం అని ఉద్బోధించారు.

ఈ సందర్భంలో మున్సిపల్ కమిషనర్ కె.రామచంద్రారెడ్డి, మున్సిపల్ ఇంజనీర్ టి.త్రినాధ రావు, ఎంహెచ్ఓ ఆర్.సోమశేఖర్, జిల్లా దేవాదాయ శాఖ అధికారి, జిల్లా బీసీ సంక్షేమ శాఖ అధికారి ఏ.వి సూరిబాబు, వసతి గృహ సంక్షేమ అధికారి కె.నాగమోహన్ రావు, తదితరులు ఉన్నారు.