చేనేత రంగం అభివృద్ధికి ప్రభుత్వం అమలు చేస్తున్న సంక్షేమ పథకాలను నేత కార్మికులు సద్వినియోగం చేసుకోవాలి–జిల్లా కలెక్టర్ చదలవాడ నాగరాణి

చేనేత, హస్తకళా రంగానికి పూర్వ వైభవం తెచ్చేందుకు ప్రతి ఒక్కరూ సహకరించాలి.

ప్రతి ఒక్కరూ చేనేత దుస్తులు వినియోగించి చేనేత రంగాన్ని కాపాడుకోవాలి.

అంతరించి పోతున్న హస్త కళలకు, చేనేత ఉత్పత్తుల పునర్జీవానికి క్రాఫ్ట్ కౌన్సిల్ ఆఫ్ ఏపి సంస్థ చేస్తున్న కృషి అభినందనీయమని జిల్లా కలెక్టర్ చదలవాడ నాగరాణి పేర్కొన్నారు

శనివారం భీమవరం కలెక్టరేట్ పి.జి.ఆర్.ఎస్ సమావేశమందిరం నందు చేనేత, జౌళి శాఖ, క్రాఫ్ట్ కౌన్సిల్ ఆఫ్ ఏపి సంస్థ సంయుక్త ఆధ్వర్యంలో చేనేత నేతదారులకు చేనేత నైపుణ్య కార్మికుల సన్మాన కార్యక్రమానికి జిల్లా కలెక్టర్ చదలవాడ నాగరాణి ముఖ్యఅతిథిగా పాల్గొన్నారు. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ చేనేత రంగంలో వేలాది చేనేత కార్మికులు చేనేత వస్త్రాల తయారీలో జీవనోపాధి కొనసాగిస్తున్నారన్నారు. జిల్లాలో ఎంతో నైపుణ్యం గల చేనేత కార్మికులు వివిధ కళాత్మక దుస్తులను తయారు చేయడం జరుగుతుందన్నారు. చేనేత శారీరక శ్రమతో కూడుకున్న పని అని ఉదయం 6:00 నుండి రాత్రి 10.00 గంటల వరకు కుటుంబ సభ్యులు అందరు నేతపనిలో ఉంటారన్నారు. దుస్తుల తయారీలో యాంత్రీకరణ ప్రవేశించడంతో చేనేత రంగం బలహీనమైందన్నారు. ప్రపంచ దేశాలలో చేనేత ఒకప్పుడు ప్రముఖంగా ఉండేదని, ఇప్పుడు కొద్దిగా భారతదేశంలో తప్ప మిగతా దేశాలలో కనుమరుగైందన్నారు. భారతదేశంలో అత్యున్నతమైన నేతదారులను కనుమరుగు చేయడానికి విదేశాలు చాలా ప్రయత్నాలు, ఆటంకాలు కలిగించడం జరిగిందని, గిరాకిని, డిమాండ్ ను తగ్గించడానికి టెక్స్టైల్స్ ను ప్రోత్సహించడానికి చరిత్రలోకి వెళ్తే నేతదారుల వేళ్లను కూడా తొలగించడం జరిగిందని తెలియవస్తుందన్నారు. చేనేత రంగాన్ని ఆదుకునేందుకు ప్రభుత్వం అనేక సంక్షేమ పథకాలు అమలు చేస్తున్నది అన్నారు. అర్హులైన చేనేత కార్మికులకు ప్రతినెల పింఛన్ అందించడం జరుగుతుందన్నారు. ప్రజలు చేనేత వస్త్రాలను వినియోగించడం ద్వారా చేనేత రంగాన్ని ఆదుకోవచ్చన్నారు. జిల్లాలోని చేనేత పురుష, మహిళ మగ్గందారులను రెండు, మూడు నెలలుగా క్రాఫ్ట్ కౌన్సిల్ ఆఫ్ ఏపీ బృందం పరిశీలించడం జరిగిందన్నారు. చేనేత వస్త్రాలు, హస్తకళలు మరుగున పడకుండా ఉనికిని కాపాడేందుకు క్రాఫ్ట్ కౌన్సిల్ ఆఫ్ ఇండియా సంస్థ చేస్తున్న కృషి అభినందనీయమని, ఇటువంటి సంస్థలకు సహాయ సహకారాలు అందించిన అవసరం ఎంతైనా ఉందన్నారు.

క్రాఫ్ట్ కౌన్సిల్ ఆఫ్ ఎపి సంస్థ సెక్రటరీ ఎస్.రంజనా మాట్లాడుతూ అంతరించిపోతున్న హస్త కళలు, చేనేత పరిశ్రమను ముందుకు నడిపించడానికి పది సంవత్సరాలకు మా సంస్థ ద్వారా పనిచేస్తున్నామన్నారు. జిల్లాలో ఎంతో నైపుణ్యం గల చేనేత కార్మికుల ఉన్నారని వారి చేనేత కళ నైపుణ్యాన్ని స్వయంగా చూడడం జరిగింది అన్నారు. జిల్లా కలెక్టర్ చదలవాడ నాగరాణి చేనేత జౌళి శాఖ కమిషనర్ గా పనిచేసిన సమయంలో చేనేత రంగంలో అనేక మార్పులు తీసుకొచ్చారన్నారు . ఆదరణ కోల్పోతున్న చేనేత రంగాన్ని, చేనేత కార్మికులను ఆదుకునేందుకు కౌన్సిల్ తరఫున అనేక అవగాహన కార్యక్రమాలు చేపడుతున్నామన్నారు. మా సంస్థ ద్వారా ఎగ్జిబిషన్స్, గాంధీ జయంతి రోజున చేనేత వస్త్ర ప్రదర్శనలు ఏర్పాటు, వసంతం పేరిట నవంబర్ 5, 6 తేదీల్లో చేనేత వస్త్ర ప్రదర్శనలు, పాఠశాలల్లో విద్యార్థులకు కొండపల్లి, ఏటికొప్పాక కళాకారులచే బొమ్మల తయారీ నేర్పించడం, చేనేతదారుల ఆరోగ్య సంరక్షణలో భాగంగా మెడికల్ క్యాంపులు నిర్వహణ, పాఠశాల, కళాశాల విద్యార్థులకు చేనేత వస్త్రాలు ఎలా తయారవుతాయి అనే విషయాన్ని స్వయంగా దారం వడకటం, వేయడం తదితర విషయాలపై అవగాహన కల్పించడం, తదితర సర్వీస్ లను అందజేయడం జరుగుతుందని తెలిపారు.

ఈ సందర్భంగా సుదీర్ఘకాలంగా చేనేత రంగంలో తమ కళ నైపుణ్యంతో చేనేత ఉత్పత్తులు చేస్తున్న చింతపర్రు గ్రామానికి చెందిన వీర గణపతి, వాసా భ్రమరాంబ, కె.వీర నరసన్న లకు 25 వేల రూపాయల నగదు బహుమతులను జిల్లా కలెక్టర్ చదలవాడ నాగరాణి చేతుల మీదుగా అందించి వారిని ఘనంగా సత్కరించారు. అదేవిధంగా చింతపర్రు, బగ్గేశ్వరం, రాయకుదురు, పాలకొల్లు, రామచంద్రపురం, దగ్గులూరు, భీమవరం, ఆచంట వేమవరం గ్రామాలకు చెందిన చేనేత కార్మికులను చేనేత కండువాతో జిల్లా కలెక్టర్ చేతుల మీదుగా సన్మానించడం జరిగింది

ఈ సమావేశంలో జిల్లా చేనేత, జౌళి శాఖ అధికారి ఎ.అప్పారావు, డిఆర్డిఏ పిడి ఎంఎస్ఎస్ వేణుగోపాల్, క్రాఫ్ట్ కౌన్సిల్ వైస్ చైర్మన్ బి.సుజాత, కౌన్సిల్ సభ్యులు పి.సునీత, డి.అవంతి, ఎస్.ప్రమీల రాణి, పి.సౌభాగ్య, సిహెచ్ లీల, వివిధ గ్రామాలకు చెందిన చేనేత కార్మికులు, తదితరులు పాల్గొన్నారు.