పీఎం ధన్-ధాన్య కృషి యోజన కింద అమలుతో జిల్లా అభివృద్ధికి ఎంతో ఉపయోగం–జిల్లా కలెక్టర్ చదలవాడ నాగరాణి

ప్రధానమంత్రి ధన్ ధాన్య కృషి యోజన పథకం ద్వారా జిల్లాకు ఎంతో లబ్ధి..

….కేంద్ర ఉక్కు, భారీ పరిశ్రమల శాఖ సహాయం మంత్రి భూపతి రాజు శ్రీనివాస వర్మ

శనివారం న్యూఢిల్లీలోని నేషనల్ అగ్రికల్చరల్ సైన్స్ కాంప్లెక్స్ (ఎన్.ఏ.ఎస్.సి) నుంచి నిర్వహించిన ప్రధానమంత్రి ధన్ ధాన్య కృషి యోజన (పీఎండిడికెవై) పథకం ప్రారంభోత్సవ కార్యక్రమంలో గౌరవ భారత దేశ ప్రధానమంత్రి నరేంద్ర మోదీ పాల్గొన్నారు.

పశ్చిమగోదావరి జిల్లా ఉండి మండలం ఉండి కృషి విజ్ఞాన కేంద్రం సమావేశ మందిరం నుండి వర్చువల్ విధానంలో ప్రత్యక్ష ప్రసారం ద్వారా వీక్షించే కార్యక్రమంలో కేంద్ర ఉక్కు, భారీ పరిశ్రమల శాఖ సహాయ మంత్రి భూపతి రాజు శ్రీనివాస్ వర్మ, జిల్లా కలెక్టర్ చదలవాడ నాగరాణి, భీమవరం శాసనసభ్యులు, పిఎసి చైర్మన్ పులపర్తి రామాంజనేయులు పాల్గొన్నారు.

నేషనల్ అగ్రికల్చరల్ సైన్స్ కాంప్లెక్స్ నుంచి ప్రధానమంత్రి నరేంద్ర మోదీ మాట్లాడుతూ ఎన్డీఏ ప్రభుత్వం వచ్చాక రైతులపై ప్రత్యేక శ్రద్ధ పెట్టిందని, రైతులు ప్రయోజనాల కోసం అనేక పథకాలు తీసుకొచ్చామన్నారు. పాల ఉత్పత్తుల్లో ప్రపంచంలోనే ప్రథమ స్థానంలో ఉన్నామని, వ్యవసాయ రంగంలో నేడు ధనధాన్య కృషి యోజన, పప్పుధాన్యాల ఆత్మ నిర్భరత అనే రెండు పథకాలు ప్రారంభించుకోవడం సంతోషంగా ఉందన్నారు. ఏ పథకం ప్రారంభించిన పేదలను దృష్టిలో పెట్టుకునే చేస్తున్నామని, రైతుల కోసం ఖర్చు చేయడంలో వెనుకాడేది లేదని, రైతులు బాగుంటేనే దేశం సుభిక్షంగా ఉంటుందన్నారు. గత ప్రభుత్వాలు రైతులను ఏనాడు పట్టించుకోలేదని, రైతులు ముఖాల్లో ఆనందం చూడాలనేదే మా మొదటి ప్రాధాన్యత అని, రైతులకు ఎదురవుతున్న సవాళ్ల పరిష్కారంలో నూతన ఆవిష్కరణలు వస్తున్నాయన్నారు.

ఈ సందర్భంగా కేంద్ర ఉక్కు, భారీ పరిశ్రమల శాఖ సహాయ మంత్రి భూపతి రాజు శ్రీనివాస వర్మ మాట్లాడుతూ భారతదేశం వ్యవసాయ ఆధారిత దేశమని, గత ప్రభుత్వాలు రైతాంగాన్ని పూర్తిగా నిర్లక్ష్యం చేశాయన్నారు. గౌరవ ప్రధానమంత్రి నరేంద్ర మోడీ అధికారంలోకి వచ్చిన తరువాత రైతులకు ఆర్థిక భద్రత కల్పించడం, వారికీ రెట్టింపు ఆదాయాన్ని పెంచడం కోసం అనేక సంక్షేమ కార్యక్రమాలు అమలు చేస్తున్నారన్నారు. ఇందులో భాగంగానే నేడు ప్రధానమంత్రి ధన్ ధాన్య కృషి యోజన కార్యక్రమాన్ని ప్రారంభించుకున్నమన్నారు. ఈ కార్యక్రమాన్ని రైతాంగం సద్వినియోగం చేసుకొని ఆర్థికంగా పురోగతి సాధించాలన్నారు. రైతాంగం వరితోపాటు ప్రత్యామ్నాయ పంటలైన పప్పు ధాన్యాల సాగుపై దృష్టి కేంద్రీకరించాలన్నారు. భారతదేశం నేడు ప్రపంచంలో నాలుగవ ఆర్థిక శక్తిగా ఎదిగిందని, శాస్త్ర సాంకేతిక రంగాల పురోభివృద్ధిలో ముందున్నమన్నారు. మన దేశం ప్రతి సంవత్సరం పప్పు ధాన్యాల దిగుమతికి 60 వేల కోట్ల రూపాయలు ఖర్చు చేస్తోందన్నారు. కావున రైతాంగం పప్పు ధాన్యాల సాగుపై దృష్టి కేంద్రీకరిస్తే దిగుమతులు తగ్గించుకోవచ్చు అన్నారు. కృషి విజ్ఞాన కేంద్ర శాస్త్రవేత్తలు, అధికారులు రైతులకు కేంద్ర, రాష్ట్ర ప్రభుత్వాలు అమలు చేస్తున్న పథకాలపై అవగాహన కల్పించి వాటిని వినియోగించుకునేలా ప్రోత్సహించాలన్నారు. ఈ పథకం అమలుకు ప్రభుత్వం వేల కోట్ల రూపాయలు కేటాయించిందని ఈ పథకాన్ని వినియోగించుకొని అదనంగా ఆదాయాన్ని పెంచుకోవాలని ఆయన రైతులను కోరారు.

జిల్లా కలెక్టర్ చదలవాడ నాగరాణి మాట్లాడుతూ ప్రధానమంత్రి ధన్ ధాన్య కృషి యోజన పథకం రైతులకు ఎంతో ప్రయోజనకరంగా ఉంటుందన్నారు. ఈ పథకం అమలుకు దేశవ్యాప్తంగా 100 జిల్లాలను ప్రత్యేకంగా ఎంపిక చేశారు అన్నారు. దీనిలో భాగంగా మన రాష్ట్రంలో నాలుగు జిల్లాలలో అమలుకు వర్తింపు చేశారు అన్నారు. అల్లూరి సీతారామరాజు జిల్లా, అన్నమయ్య, అనంతపురం, సత్యసాయి జిల్లాల్లో ఈ సంవత్సరం నుండి అమలు జరుగుతుందన్నారు. వ్యవసాయ ఉత్పాదకత పెంచడం, ఆధునిక సాగు పద్ధతులు ప్రవేశపెట్టడం, నీటి వనరులను సమర్ధవంతంగా ఉపయోగించడం ఈ పథకం ప్రధాన లక్ష్యం అన్నారు. రైతులకు తక్కువ వడ్డీ రుణాలు, ప్రత్యామ్నాయ పంటలు వేయడం, సహజ వ్యవసాయం వ్యవసాయానికి ప్రోత్సహించడం జరుగుతుందన్నారు. ఈ పథకం ద్వారా మన జిల్లాకు మంచి ఫలాలు అందుతాయన్నారు. రైతులు వరి సాగుతో పాటు ప్రత్యామ్నాయ పంటలైన పప్పు ధాన్యాలను సాగు చేసి ఆర్థికంగా పురోగతి సాధించాలన్నారు. వ్యవసాయ శాస్త్రవేత్తలు, వ్యవసాయ అధికారులు రైతులకు తగు సూచనలు, సలహాలు అందించి వారికి నిరంతరం అందుబాటులో ఉండాలన్నారు.

పీఏసీ చైర్మన్ భీమవరం శాసనసభ్యులు పులపర్తి రామాంజనేయులు మాట్లాడుతూ నేడు ప్రారంభించిన ప్రధానమంత్రి ధన్ ధాన్య కృషి యోజన కార్యక్రమం రైతాంగానికి ఎంతో మేలు చేస్తుందన్నారు. ఈ కార్యక్రమాన్ని ప్రతి ఒక్కరూ సద్వినియోగం చేసుకోవాలన్నారు. వ్యవసాయ రంగంలో రైతులు ఆధునిక సాగు విధానాలను పాటించాలన్నారు. ఆహార ధాన్యాలతో పాటు చిరుధాన్యాల సాగుపై కూడా రైతాంగం దృష్టి పెట్టాలన్నారు. రైతులు అంతర్గత పంటలు పండించేందుకు వ్యవసాయ అధికారులు వారికి అవగాహన కల్పించాలన్నారు. మనం తినే వరి రకాలనే పండించడానికి ప్రాధాన్యత ఇవ్వాలని రైతులకు సూచించారు.

ఈ సందర్భంగా కేంద్ర మంత్రివర్యులు భూపతి రాజు శ్రీనివాస వర్మ, జిల్లా కలెక్టర్ చదలవాడ నాగరాణి ఉండి కృషి విజ్ఞాన కేంద్రంలో ఏర్పాటు చేసిన ఆర్గానిక్ ఉత్పత్తుల స్టాల్ ను, సమాచార కేంద్రాన్ని, కృషి విజ్ఞాన కేంద్ర ప్రాంగణంలో పెంచుతున్న పండ్ల మొక్కలు, పూల మొక్కలు, ఇండోర్ ప్లాంట్స్ ను, వరి రకాల ప్రదర్శన క్షేత్రాన్ని, వరి విత్తనోత్పత్తి క్షేత్రాన్ని పరిశీలించారు.

ఈ కార్యక్రమంలో మార్టేరు వ్యవసాయ పరిశోధన సంస్థ శాస్త్రవేత్తలు సిహెచ్ శ్రీనివాస్, డాక్టర్ భువనేశ్వరి, డాక్టర్ ఆనంద్ కుమార్, కృషి విజ్ఞాన కేంద్రం శాస్త్రవేత్త విజయలక్ష్మి, వ్యవసాయ శాఖ జాయింట్ డైరెక్టర్ జెడ్.వెంకటేశ్వరరావు, ప్రోగ్రాం కోఆర్డినేటర్ ఎన్.మల్లికార్జునరావు, జిల్లాలోని మండల వ్యవసాయ శాఖ అధికారులు, ఎన్ ఆర్ పి అగ్రహారం సర్పంచ్ కనకదుర్గ, విద్యార్థులు, రైతులు, సిబ్బంది తదితరులు పాల్గొన్నారు.