2027 గోదావరి పుష్కరాలకు జిల్లాలో చేయాల్సిన ఏర్పాట్లపై అధికారులకు దిశా నిర్దేశం–జిల్లా జాయింట్ కలెక్టర్ రాహుల్ కుమార్ రెడ్డి

గురువారం కలెక్టరేట్ జాయింట్ కలెక్టర్ ఛాంబర్ నందు జిల్లా జాయింట్ కలెక్టర్ టి.రాహుల్ కుమార్ రెడ్డి 2027 గోదావరి పుష్కరాలు సంబంధించి ఏర్పాట్లలో భాగంగా యాత్రికుల సౌకర్యార్థం శాఖల వారి చేయవలసిన ఏర్పాట్లకు సంబంధించిన బడ్జెట్ రూపకల్పనపై రెవిన్యూ , పోలీస్, పంచాయితీ, పి ఆర్, ఆర్ అండ్ బి, ఆర్డబ్ల్యూఎస్, మున్సిపాలిటీ, ఎలక్ట్రికల్, ఫైర్, కన్సర్వెన్సీ, మెడికల్, తదితర శాఖల జిల్లా అధికారులతో సమీక్ష నిర్వహించారు.

ఈ సందర్భంగా జిల్లా జాయింట్ కలెక్టర్ టి.రాహుల్ కుమార్ రెడ్డి మాట్లాడుతూ వచ్చే 2027 గోదావరి పుష్కరాలు సంబంధించి యాత్రికుల సౌకర్యార్థం చేయవలసిన అభివృద్ధి పనులు వాటికి అయ్యే ఖర్చుకు సంబంధించి శాఖల వారిగా తయారుచేసిన బడ్జెట్ వివరాలను అడిగి తెలుసుకున్నారు. శాఖల వారీగా చేయవలసిన పనులపై దిశా నిర్దేశం చేశారు. పశ్చిమగోదావరి జిల్లా గోదావరి నది పరివాహక ప్రాంతానికి సంబంధించి పనుల నిర్వహణకు కన్జర్వెన్సీ శాఖలకు గుర్తించిన 42 పుష్కర ఘాటులకు సంబంధించిన రిపేర్లు, అప్రోచ్ రోడ్లు, లైటింగ్, త్రాగునీరు, శానిటేషన్, టాయిలెట్స్, ఆలయాల మరమ్మతులు, మున్సిపాలిటీల్లో బీటీ రోడ్లు, డ్రైన్స్, ఏటుగట్టు సుందరీకరణ పనులు, నరసాపురం, పాలకొల్లు పట్టణంలో వసతి గృహాలు రిపేర్లు పనులు, హైవేలలో రోడ్డు మధ్యలో, ఇరువైపులా స్వాగత ద్వారాలు, జనరేటర్స్, మెడికల్ క్యాంపులు, తదితర పనులకు సంబంధించిన వాటిపై సంబంధించిన శాఖల అధికారులకు పలు సూచనలు జారీ చేశారు. మార్పులు, చేర్పులు ఏమైనా ఉంటే రేపటి లోగా నివేదికలను సిద్ధం చేసి అందించాలని సంబంధిత శాఖల అధికారులను ఆదేశించారు.

ఈ సమీక్ష సమావేశంలో డి ఆర్ ఓ బి.శివన్నారాయణ రెడ్డి, జిల్లా అడిషనల్ ఎస్పీ వి.భీమారావు, డిపిఓ రామ్నాథ్ రెడ్డి, జిల్లా టూరిజం శాఖ అధికారి ఏ.వి అప్పారావు, జిల్లా విద్యుత్ శాఖ అధికారి ఉషారాణి, జిల్లా ఆర్డబ్ల్యూఎస్ అధికారి కె .శ్రీనివాసరావు, ఆర్ అండ్ బి ఎస్.ఇ ఏ.శ్రీనివాసరావు, నరసాపురం మున్సిపల్ కమిషనర్ ఎం.అంజయ్య, మత్స్య శాఖ ఏడి ఎల్.ఎన్ రాజు, కలెక్టరేట్ డిప్యూటీ తహసిల్దార్ మర్రాపు సన్యాసిరావు, వివిధ శాఖల అధికారులు, తదితరులు పాల్గొన్నారు.