ఆటో డ్రైవర్ల సంక్షేమం కోసం కూటమి ప్రభుత్వం అందిస్తున్న కానుకగా ఆటో డ్రైవర్ల సేవలో పథకాన్ని అభివర్ణించిన కేంద్ర మంత్రి భూపతి రాజు శ్రీనివాస వర్మ

ఆటో డ్రైవర్లకు అండగా కూటమి సర్కార్

ఆటో రిక్షా, మ్యాక్సీ క్యాబ్, మోటార్ క్యాబ్ ల డ్రైవర్లకు ఏటా రూ.15,000 ఆర్థిక సాయం.. రాష్ట్రవ్యాప్తంగా 2.90 లక్షల మందికి రూ.436 కోట్ల లబ్ధి

ప్రభుత్వ విధానాల విషయంలో గత ప్రభుత్వానికి, కూటమి ప్రభుత్వానికి తేడా గమనించాలని సూచించిన కేంద్ర మంత్రి శ్రీనివాస వర్మ

ఆటో డ్రైవర్లకు అండగా కూటమి సర్కార్ ఉంటుందని కేంద్ర మంత్రి భూపతి రాజు శ్రీనివాస వర్మ భరోసానిచ్చారు.

శనివారం భీమవరం మున్సిపల్ కార్యాలయం ఆవరణలో ఏర్పాటు చేసిన ఆటో డ్రైవర్ల సేవలో కార్యక్రమాన్ని జిల్లా కలెక్టర్ చదలవాడ నాగరాణి, శాసనసభ్యులు మరియు పిఎసి చైర్మన్ పులపర్తి రామాంజనేయులు, ఏపీఐఐసీ చైర్మన్ మంతెన రామరాజు, స్థానిక ప్రజాప్రతినిధులు, అధికారులతో కలిసి కేంద్ర మంత్రి భూపతి రాజు శ్రీనివాస వర్మ ప్రారంభించారు.

ఈ సందర్భంగా కేంద్ర మంత్రి భూపతి రాజు శ్రీనివాస వర్మ మాట్లాడుతూ రాష్ట్రవ్యాప్తంగా అత్యంత ప్రతిష్టాత్మకంగా ఆటోడ్రైవర్ల సేవలో కార్యక్రమాన్ని కూటమి ప్రభుత్వం ప్రారంభించిందన్నారు. తద్వారా రాష్ట్రవ్యాప్తంగా సొంత వాహనం కలిగిన ఆటో రిక్షా, మోటార్ క్యాబ్, మ్యాక్సీ క్యాబ్ డ్రైవర్లు 2,90,669 మంది లబ్ధిదారుల ఖాతాల్లో ఒక్కొక్కరికి రూ.15,000 చొప్పున రూ.436 కోట్లు నేరుగా జమ చేస్తున్నామన్నారు. కూటమి ప్రభుత్వం ఆటో డ్రైవర్ల సేవలో పథకం ద్వారా ఆటో డ్రైవర్ల సంక్షేమం కోసం చేస్తున్న కృషిని వివరించారు. ఆటోలో తమ ప్రయాణ అనుభూతులను గుర్తు చేసుకున్నారు. అదే విధంగా కూటమి ప్రభుత్వం రాష్ట్రాన్ని అభివృద్ధి, సంక్షేమ పథంలో ముందుకు తీసుకెళ్తుందని పేర్కొన్నారు. పశ్చిమగోదావరి జిల్లాలో 8,489 మంది లబ్ధిదారుల ఖాతాల్లో రూ.12.73 కోట్లు జమచేయడం జరిగిందన్నారు. రాష్ట్రంలో ఎక్కడకు వెళ్లినా ప్రయాణీకులు ముందుగా ఆధారపడేది ఆటోలపైనే అని కేంద్ర మంత్రి అన్నారు. బస్సులు సైతం వెళ్లలేని మారుమూల ప్రాంతాలకు కూడా ఆటోలు వెళ్తూ ప్రయాణీకులకు సేవలు అందిస్తున్నాయన్నారు. పగలు, రాత్రి కష్టపడుతూ స్వయం కృషితో ఎదిగిన ఆటో డ్రైవర్లకు కేంద్ర మంత్రి భూపతి రాజు శ్రీనివాస వర్మ అభినందనలు తెలిపారు. ప్రజలు కూటమి ప్రభుత్వ విధానాలు అర్థం చేసుకోవాలన్నారు. ప్రతి ఒక్కరూ కూటమి ప్రభుత్వ సహకారాన్ని అందిపుచ్చుకోవాలన్నారు. ప్రధాని నరేంద్ర మోదీ, సీఎం చంద్రబాబునాయుడు, డిప్యూటీ సీఎం పవన్ కళ్యాణ్ ల నేతృత్వంలో అన్ని వర్గాలకు న్యాయం చేస్తున్న కూటమి ప్రభుత్వాన్ని ఆశీర్వదించాలని ఈ సందర్భంగా కేంద్ర మంత్రి భూపతి రాజు శ్రీనివాస వర్మ ప్రజలను కోరారు.

జిల్లా కలెక్టర్ చదలవాడ నాగరాణి మాట్లాడుతూ ఆటో గ్రామీణ ఆర్థిక వ్యవస్థకు పట్టుకొమ్మ అని కొనియాడారు. ఏ చిన్న అవసరం వచ్చిన, పిల్లలను విద్యావంతులను చేయాలన్న ఆటో అవసరం ఎంతో ఉందన్నారు. ఆటో డ్రైవర్లు స్వయం కృషితో ఉపాధి సృష్టించుకొని చరిత్ర సృష్టిస్తున్నారని అన్నారు. ఆటో డ్రైవర్ల సమస్యలు తీర్చడం కోసం ప్రభుత్వం అన్ని ప్రణాళికలు సిద్ధం చేసి అమలు చేస్తుందన్నారు. నియోజకవర్గాల వారీగా తణుకు 1,317 మందికి రూ.1,97,55,000/-, పాలకొల్లు 1,139 మందికి 1,70,85,000/-, తాడేపల్లిగూడెం 1,265 మందికి రూ.1,89,75,000/-, భీమవరం 1,244 మందికి 1,86,60,000/-, ఆచంట 805 మందికి రూ.1,20,75,000/-, ఉండి 1,536 మందికి రూ.2,30,40,000/-, నరసాపురం 880 మందికి రూ.1,32,00,000/-, ఉంగుటూరు కాన్స్టెన్సీ లోని గణపవరం 303 మందికి రూ.45,45,000/- లు జిల్లాలోని మొత్తం 20 మండలాల్లో 8,489 మందికి రూ.12,73,35,000/- ఆటో డ్రైవర్ల సేవా పథకంలో భాగంగా ఆటో డ్రైవర్ల ఖాతాల్లో నేడు నగదును జమ చేయడం జరిగిందని తెలిపారు.

భీమవరం శాసనసభ్యులు మరియు పిఎసి చైర్మన్ పులపర్తి రామాంజనేయులు మాట్లాడుతూ
ఎన్నికల్లో ఇచ్చిన హామీ ప్రకారం స్త్రీ శక్తి కార్యక్రమం ద్వారా మహిళలకు ఉచిత బస్సు ప్రయాణం పథకాన్ని అమలు చేసినప్పుడు తాము ఆర్థికంగా నష్టపోతున్నామని ఆటోడ్రైవర్లు తమకు విన్నవించారని ఎమ్మెల్యే గుర్తుచేశారు. ఈ సందర్భంగా వారి బాధలు, గాథలు విన్న కూటమి ప్రభుత్వం వెంటనే స్పందించి ఎన్నికల్లో హామీ ఇవ్వకున్నా కూడా ఆటో డ్రైవర్లకు సేవలో కార్యక్రమం ద్వారా ఆర్థిక భరోసా అందిస్తుందన్నారు. ఈ సందర్భంగా సీఎం చంద్రబాబునాయుడుకు ఆటో డ్రైవర్ల తరపున ఎమ్మెల్యే రామాంజనేయులు ధన్యవాదాలు తెలిపారు. గత ప్రభుత్వం వాహనమిత్ర క్రింద రూ.10 వేలు ఇచ్చిందని అన్నారు. కానీ నాడు గ్రీన్ ట్యాక్స్ భారీగా విధించడం, రోడ్లు అధ్వాన్నంగా ఉండటం, తదితర కారణాల వల్ల ఆ సొమ్ము దేనికీ ఉపయోగంలో లేకుండా పోయిందన్నారు. పైగా గత ప్రభుత్వం అనుసరించిన అనాలోచిత విధానాల వల్ల అదనంగా ఆటో డ్రైవర్లు మరో రూ.10 వేలు ఖర్చు పెట్టాల్సిన దుస్థితి నెలకొన్న విషయాన్ని, నాడు ఆటోడ్రైవర్లు అనుభవించిన ఇబ్బందులను, ఎదుర్కొన్న అవాంతరాలను కళ్లకు కట్టినట్లుగా వివరించారు. కానీ కూటమి ప్రభుత్వం అధికారంలోకి వచ్చాక రాష్ట్రవ్యాప్తంగా గ్రామాల్లో లింక్ రోడ్లు వేస్తున్నామన్నారు. ఆర్ అండ్ బీ రోడ్లు వేస్తున్నామన్నారు. గుంతల రహిత ఆంధ్రప్రదేశ్ కార్యక్రమం ద్వారా ప్రధాన రహదారులు అన్నీ బాగుచేశామన్నారు. గ్రీన్ ట్యాక్స్ ను రూ.3 వేలకు తగ్గించామన్నారు. తద్వారా సజావుగా ప్రయాణం సాగి, పెట్రోల్ ఆదా జరుగుతుందన్నారు. ఈ క్రమంలో కూటమి ప్రభుత్వం అందించిన రూ.15000 ఆర్థిక సాయం కుటుంబ అవసరాల కోసం వినియోగించుకునే అవకాశం లభించిందన్నారు. ఈ సందర్భంగా ఆటో డ్రైవర్లకు ఎలాంటి ఇబ్బందులు కలగకుండా చూసుకునే బాధ్యత కూటమి ప్రభుత్వానిదని ఎమ్మెల్యే పులపర్తి రామాంజనేయులు భరోసానిచ్చారు.

ఆటో డ్రైవర్ల సేవలో రాష్ట్ర ముఖ్యమంత్రి ప్రారంభోత్సవ కార్యక్రమాన్ని కేంద్ర మంత్రి భూపతి రాజు శ్రీనివాస్ వర్మ, జిల్లా కలెక్టర్ చదలవాడ నాగరాణి, ఎమ్మెల్యే పులపర్తి రామాంజనేయులు, ఏపీఐఐసీ చైర్మన్ మంతెన రామరాజు, అధికారులు, ఆటో చోదకులు, తదితరులు వర్చువల్ గా తిలకించారు.

పశ్చిమగోదావరి జిల్లాకి సంబంధించి 8,489 మంది లబ్ధిదారులకు రూ.12.73 కోట్ల రూపాయల నమూనా చెక్కును ఆటో యూనియన్ ప్రతినిధులకు కేంద్ర మంత్రి భూపతి రాజు శ్రీనివాస్ వర్మ, జిల్లా కలెక్టర్ చదలవాడ నాగరాణి, ఎమ్మెల్యే పులపర్తి రామాంజనేయులు చేతుల మీదుగా అందజేయడం జరిగింది.

తొలుత భీమవరం ఓల్డ్ బస్టాండ్ నుండి 200 ఆటోలతో ఏర్పాటు చేసిన ఆటో ర్యాలీని భీమవరం శాసనసభ్యులు పులపర్తి రామాంజనేయులు జెండా ఊపి ప్రారంభించారు. పాత బస్టాండ్ నుండి ఆటోలోనే జిల్లా కలెక్టర్ చదలవాడ నాగరాణి, శాసనసభ్యులు పులపర్తి రామాంజనేయులు ప్రయాణించి ఆటో డ్రైవర్లను ఉత్సాహపరిచారు.

చివరిగా కేంద్ర ఉక్కు, భారీ పరిశ్రమల శాఖ సహాయ మంత్రి భూపతి రాజు శ్రీనివాస్ వర్మ జిల్లా కలెక్టర్ చదలవాడ నాగరాణి, ఏపీఐఐసీ చైర్మన్ మంతెన రామరాజును ఆటోలో ఎక్కించుకొని స్వయంగా ఆటో నడపడం అందరిలో ఒకింత ఆశ్చర్యం, ఆనందాన్ని కలిగించాయి.

కార్యక్రమంలో ఏపీఐఐసీ చైర్మన్ మంతెన రామరాజు, జిల్లా ఆటో యూనియన్ ప్రెసిడెంట్ ఎం. సత్యనారాయణ, జిల్లా చేనేత అధికారి మరియు స్పెషల్ ఆఫీసర్ కె.అప్పారావు, జిల్లా రవాణా అధికారి కే ఎస్ ఎన్ బి కృష్ణారావు, భీమవరం ఆర్డీవో కే.ప్రవీణ్ కుమార్ రెడ్డి, మున్సిపల్ కమిషనర్ కే రామచంద్ర రెడ్డి, జి ఎస్ డబ్ల్యూ ఎస్ అధికారి వై.దోసిరెడ్డి, తహసిల్దార్ రావి రాంబాబు, ఏఎంసీ చైర్మన్ కలిదిండి సుజాత, మాజీ ఏఎంసీ చైర్మన్ కోళ్ల నాగేశ్వరరావు, మైనార్టీ కార్పొరేషన్ ఫైనాన్స్ డైరెక్టర్ ఎండి షబీనా, స్థానిక నాయకులు మెంటే పార్థసారథి, రామలింగరాజు, చంద్రశేఖర్, బండి రమేష్, మద్దాల రాము, గోవింద్, మాదాసు కనకదుర్గ, గంధం రాధా, కూటమి నాయకులు తదితరులు పాల్గొన్నారు.