ఖరీఫ్ సీజన్ ధాన్యం సేకరణకు అధికారులు సన్నద్ధం కావాలి–జిల్లా జాయింట్ కలెక్టర్ టీ. రాహుల్ కుమార్ రెడ్డి

మిల్లర్ల నుండి నాణ్యమైన గోనే సంచులను సేకరించి రైతులకు అందించేందుకు ఇప్పటి నుండే చర్యలు చేపట్టాలి

శుక్రవారం కలెక్టరేట్ జాయింట్ కలెక్టర్ ఛాంబర్ నుండి జాయింట్ కలెక్టర్ టి. రాహుల్ కుమార్ రెడ్డి ధాన్యం సేకరణ, రీ సర్వే, జిఎస్టి, సుమోటో క్యాస్ట్ వెరిఫికేషన్, ఇళ్ల స్థలాలు తదితర అంశాల ప్రగతిపై మండలాల వారీగా డిఆర్ఓ, రెవిన్యూ డివిజనల్ అధికారులు, ఎంపీడీవోలు, తాసిల్దారులు, కమర్షియల్ టాక్స్, వ్యవసాయ శాఖ అధికారులతో వీడియో కాన్ఫరెన్స్ నిర్వహించారు. ఈ సందర్భంగా ఆయన మాట్లాడుతూ ఖరీఫ్ సీజన్ ధాన్యం సేకరణలో రైతులకు ఎక్కడ ఏ విధమైన ఇబ్బందులు లేకుండా, వివాదాలకు తావు లేకుండా అధికారులు పటిష్టమైన ఏర్పాట్లు చేయాలని ఆదేశించారు. ఆర్ ఎస్ కె ల రిజిస్ట్రేషన్ ప్రక్రియను సత్వరమే పూర్తి చేయాలన్నారు. గన్ని బ్యాగుల విషయంలో తహసిల్దార్లు ప్రత్యేక శ్రద్ధ తీసుకోవాలన్నారు. రైతు సేవా కేంద్రాలకు కేటాయించిన మిల్లుల వద్దకు ఆర్ఎస్కే సిబ్బందిని పంపించి గోనిసంచల నాణ్యతను పరిశీలించి నాణ్యమైన గోనె సంచులను ఇప్పటి నుండే సిద్ధం చేసుకోవాలన్నారు. ముఖ్యంగా తాడేపల్లిగూడెం, పెంటపాడు మండలాలకు సంబంధించి తహసిల్దార్లు పది రోజుల్లో నాణ్యమైనగోనె సంచులను మిల్లర్స్ నుండి తీసుకుని తమ వద్ద అందుబాటులో ఉంచుకోవా లన్నారు. రీ సర్వే లో భాగంగా పేజ్ -1, పేజ్ -2, పేజ్- 3 లలోని రీ సర్వే ప్రగతిని మండలాలు వారీగా సంబంధిత అధికారులతో సమీక్షించారు. గ్రామసభలు నిర్వహించి ప్రతి రైతును పిలిచి వారికి అవగాహన కల్పించి ఏ విధమైన సమస్యలు లేకుండా రీ సర్వే ప్రక్రియను పూర్తి చేయాలన్నారు. సూపర్ జీఎస్టీ…సూపర్ సేవింగ్స్ కార్యక్రమం అమలులో భాగంగా వీక్ -1, వీక్ -2 లలో నిర్వహించవలసిన కార్యక్రమాలను శనివారం సాయంత్రం లోపల పూర్తి చేసి సంబంధిత ఫోటోలను అప్లోడ్ చేయాలన్నారు. సుమోటో క్యాస్ట్ వెరిఫికేషన్ ప్రక్రియను వేగవంతం చేయాలని సంబంధిత ఆర్డీవోలును ఆదేశించారు. అర్హత గల లబ్ధిదారులకు ఇల్లు మంజూరులో అధికారులు క్షేత్రస్థాయిలో పరిశీలించి లబ్ధిదారుల దరఖాస్తులను క్షుణ్ణంగా పరిశీలించి నిబంధనల మేరకు చర్యలు తీసుకోవాలన్నారు. అభ్యంతరం లేని పోరంబోకు భూముల్లో నివాసం ఉంటున్న వారి ఇళ్ల పట్టాల మంజూరులో ముందుగా క్షేత్రస్థాయిలో పరిశీలించి జీవో నెంబర్ 30 నిబంధనల మేరకు పట్టాలు మంజూరుకు ప్రతిపాదనలు సిద్ధం చేయాలన్నారు.

ఈ గూగుల్ మీట్ లో డిఆర్ఓ బి.శివన్నారాయణ రెడ్డి నరసాపురం ఆర్డీవో దాసిరాజు, వ్యవసాయ శాఖ అధికారి జెడ్.వెంకటేశ్వరరావు, జిల్లాలోని తహాసిల్దార్లు, ఎంపీడీవోలు, మండల సర్వేయర్లు, తదితరులు పాల్గొన్నారు.