ఎంజాయ్ మెంట్ సర్వే భూములను క్షేత్రస్థాయిలో పరిశీలించిన జిల్లా జాయింట్ కలెక్టర్ టి.రాహుల్ కుమార్ రెడ్డి

మొగల్తూరు మండలంలోని కాళీపట్నం రెవిన్యూ గ్రామ పరిధిలో పాతపాడు, జగన్నాధపురం, కాళీపట్నం తూర్పు, కాళీపట్నం పడమర, కొత్తోట గ్రామాల సెటిల్మెంట్ భూములు సంబంధించి శుక్రవారం జిల్లా జాయింట్ కలెక్టర్ టి.రాహుల్ కుమార్ రెడ్డి ఎంజాయిమెంట్ సర్వేను క్షేత్రస్థాయిలో పరిశీలించారు. ఈ సందర్భంగా జిల్లా జాయింట్ కలెక్టర్ భూములకు సంబంధించిన మ్యాప్ లను పరిశీలించి, వివరాలను అధికారులను అడిగి తెలుసుకున్నారు. జగన్నాధపురం సచివాలయాన్ని సందర్శించి రికార్డులను పరిశీలించారు. రికార్డులన్నీ ఏటువంటి పొరపాట్లు లేకుండా కచ్చితంగా ఉండాలన్నారు.
ఈ సందర్భంగా రైతులతో మాట్లాడారు. గ్రామ కంఠం భూములకు సంబంధించిన అడంగల్ లో నమోదు చేసిన ఇళ్లకు సంబంధించి క్రయం విక్రయాలు రిజిస్ట్రేషన్ ను వెసులుబాటు కల్పించాలని జిల్లా జాయింట్ కలెక్టర్ ను రైతులు కోరారు. ఈ విషయంపై జిల్లా జాయింట్ కలెక్టర్ టి.రాహుల్ కుమార్ రెడ్డి మాట్లాడుతూ గ్రామ కంఠం భూములు సర్వే చేయించిన అనంతరం తగు చర్యలు తీసుకుంటామని రైతులతో అన్నారు.

ఈ సందర్భంలో జాయింట్ కలెక్టర్ వెంట నరసాపురం ఆర్డీవో దాసిరాజు, తాహసిల్దార్ రాజ్ కిషోర్, జిల్లా కలెక్టరేట్ ల్యాండ్ సూపరింటెండెంట్ సి.హెచ్ రవికుమార్, మండల ల్యాండ్ సర్వేయర్ ఎ.ధనరాజ్, డిటి జి.కళ్యాణి, వీఆర్వోలు గ్రామ సర్వేలు తదితరులు ఉన్నారు.