లైసెన్సు లేకుండా ఏ విధమైన టపాసులు తయారుచేసిన కఠిన చర్యలు ఉంటాయని హెచ్చరిక–జిల్లా కలెక్టర్ చదలవాడ నాగరాణి.

నిబంధనలకు విరుద్ధంగా దీపావళి టపాసులు అమ్మకాలు నిర్వహించే షాపులపై చర్యలు తప్పవు..

షాపులలో మందు గుండు సామాగ్రి అమ్మకానికి పిల్లలను, బాల కార్మికులను వినియోగిస్తే నిబంధనల మేరకు చర్యలు తీవ్రంగా ఉంటాయి…

గతంలో లైసెన్సులు పొంది ప్రస్తుతం రెన్యువల్ కానీ ముందుగుండు సామాగ్రి షెడ్లను క్షేత్రస్థాయిలో పోలీస్, రెవిన్యూ శాఖలు విధిగా తనిఖీసి ధ్రువీకరించాలి…

నిబంధనలు మీరిన మందు గుండు సామాగ్రి తయారీ, అమ్మకం షాపులపై చర్యలకు అలసత్వం వహించే అధికారులను ఉపేక్షించేది లేదు… ఏదైనా సంఘటన జరిగితే చర్యలు తీవ్రంగా ఉంటాయని అధికారులకు హెచ్చరిక…

జిల్లాలో దీపావళి టపాసులు తయారీ, అమ్మకాల్లో ఎటువంటి అవాంఛనీయ సంఘటనలు చోటు చేసుకోకుండా నిబంధనల మేరకు అధికారులు కట్టుదిట్టమైన చర్యలు చేపట్టాలని జిల్లా కలెక్టర్ చదలవాడ నాగరాణి సంబంధిత అధికారులను ఆదేశించారు

మంగళవారం కలెక్టరేట్ వశిష్ట సమావేశ మందిరం నందు దీపావళి టపాసులు తయారీ, అమ్మకాలకు తీసుకోవాల్సిన ముందస్తు చర్యలపై జిల్లా కలెక్టర్ చదలవాడ నాగరాణి, జిల్లా ఎస్పీ అద్నాన్ నయీం అస్మి సంయుక్తంగా వివిధ శాఖల అధికారులతో కన్వర్జెన్సీ సమావేశాన్ని నిర్వహించారు. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ దీపావళి పండుగను జిల్లా ప్రజలందరూ ఆనందోత్సాహాల మధ్య ఎటువంటి అవాంఛనీయ సంఘటనలు చోటుచేసుకోని విధంగా నిర్వహించుకోవడానికి అధికారులు ముందస్తు జాగ్రత్త చర్యలను చేపట్టాలని ఆదేశించారు. దీపావళి పిల్లలకు, పెద్దలకు ఎంతో సంతోషాన్నిస్తుందని, అలాగే అనుకోని సంఘటనలకు కూడా ఆస్కారం ఉందన్నారు. ముందస్తు చర్యలతో అధికారుల అప్రమత్తత ఎంతో అవసరం అన్నారు. లైసెన్సు లేకుండా ఏ విధమైన టపాసులు తయారుచేసిన, అమ్మిన కఠిన చర్యలు ఉంటాయని హెచ్చరించారు. గతంలో లైసెన్సులు పొంది ప్రస్తుతం రెన్యువల్ కానీ మందు గుండు సామాగ్రి తయారీ షెడ్లను క్షేత్రస్థాయిలో పోలీస్, రెవిన్యూ శాఖలు విధిగా తనిఖీచేసి, ధ్రువీకరించాలన్నారు. నిబంధనలకు విరుద్ధంగా దీపావళి టపాసులు అమ్మకాలు నిర్వహించే షాపులపై చర్యలు తప్పవు అన్నారు. షాపులలో మందు గుండు సామాగ్రి విక్రయించేందుకు సహాయంగా పిల్లలను, బాల కార్మికులను వినియోగిస్తే నిబంధనల మేరకు చర్యలు తీవ్రంగా ఉంటాయన్నారు. అలాగే నిబంధనలు మీరి మందు గుండు సామాగ్రి తయారీ, అమ్మకం షాపులపై చర్యలకు అలసత్వం వహించే అధికారులను ఉపేక్షించేది లేదన్నారు. ఏదైనా అనుకోని సంఘటన జరిగితే పూర్తి బాధ్యత వహించాల్సి ఉంటుందని అధికారులను హెచ్చరించారు. జిల్లాలో ప్రతి చిన్న విషయానికి ముందు గుండు సామాగ్రి పెద్ద ఎత్తున పేల్చడం జరుగుతున్నదని ఇది సరైనది కాదన్నారు. వాతావరణం కాలుష్యంతో పాటు, చిన్నారులకు, వృద్ధులకు, పశుపక్షాదులకు తీవ్రమైన శబ్దాలు అనారోగ్యాన్ని, ఆందోళనని కలిగిస్తాయన్న ఆలోచన ప్రతి ఒక్కరు చేయాల్సిన అవసరం ఎంతైనా ఉందన్నారు. దీపావళి పండుగ రోజున తప్ప, మిగతా కార్యక్రమాలకు మందు గుండు సామాగ్రి వినియోగించోద్దని సూచించారు.

జిల్లా సూపరింటెండెంట్ ఆఫ్ పోలీస్ అద్నాన్ నయీం అస్మి మాట్లాడుతూ నిబంధనల మేరకు దీపావళి టపాసుల షాపులను నిర్వహించాలని, తనిఖీలలో లోటుపాట్లు ఉంటే చర్యలు తీసుకోవడం జరుగుతుందన్నారు. పోలీస్, రెవిన్యూ, అగ్నిమాపక శాఖలు ఉమ్మడి తనిఖీలు ఉంటాయని, చిన్నపిల్లలను టపాసులు విక్రయించే షాపులలో ఎట్టి పరిస్థితుల్లో వినియోగించరాదన్నారు.

ఈ సమావేశంలో డిఆర్ఓ బి.శివన్నారాయణ రెడ్డి, అడిషనల్ ఎస్పీ వి.భీమారావు, జిల్లా అగ్నిమాపక శాఖ అధికారి బి.శ్రీనివాసరావు, ఆర్డీవోలు కె.ప్రవీణ్ కుమార్ రెడ్డి, ఖతీబ్ కౌసర్ భానో, దాసి రాజు, ఎస్.బి సిఐ వి వి ఎన్ సత్యనారాయణ, డిపిఓ రామనాథరెడ్డి, జిల్లా పరిశ్రమల శాఖ అధికారి యు.మంగపతి రావు, జిల్లా కార్మిక శాఖ అధికారి ఆకన లక్ష్మి, ఇన్స్పెక్టర్ ఫ్యాక్టరీస్ జి స్వాతి, పొల్యూషన్ కంట్రోల్ బోర్డు ఎనలిస్ట్ సిహెచ్ తేజస్వి, భీమవరం సహాయం మున్సిపల్ కమిషనర్ రాంబాబు, జిల్లా అసిస్టెంట్ ఫైర్ ఆఫీసర్ వై.వి జానకిరామ్, అసిస్టెంట్ కంట్రోలర్ లీగల్ మెట్రాలజీ వి.వి.నాగరాజరావు, స్టేషన్ ఫైర్ ఆఫీసర్స్, తదితరులు పాల్గొన్నారు.