పీఎం మత్స్య సంపద యోజన పథకానికి విరివిగా దరఖాస్తు చేసుకుని సద్వినియోగం చేసుకోవాలని జిల్లా కలెక్టర్ చదలవాడ నాగరాణి తెలిపారు.

బుధవారం కలెక్టరేట్ వశిష్ట సమావేశ మందిరము నందు జిల్లా కలెక్టర్ చదలవాడ నాగరాణి అధ్యక్షతన పీ.ఎం.ఎం.ఎస్.వై పథకం అమలుపై జిల్లా స్థాయి సమావేశాన్ని సంబంధిత కమిటీ సభ్యులతో నిర్వహించి సమీక్షించడం జరిగింది. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ పి.ఎం మత్స్య సంపద యోజన పథకం ద్వారా వివిధ సబ్సిడీ రుణాలను పొంది లబ్ధిదారులు ఆర్థికంగా అభివృద్ధి చెందాలన్నారు. పీఎంఎంఎస్ వై పథకం ద్వారా రుణాన్ని పొందే జనరల్ కేటగిరీ లబ్ధిదారులు 50% బ్యాంకు రుణం, 40% సబ్సిడీ, 10% లబ్ధిదారుడు వాటాగా చెల్లించాల్సి ఉంటుందని, అలాగే ఎస్సీ, ఎస్టీ లబ్ధిదారులు 30% బ్యాంకు రుణం, 60 శాతం సబ్సిడీ, 10% లబ్ధిదారులు వాటాగా చెల్లించాల్సి ఉంటుందన్నారు. ఈరోజు నిర్వహించిన సమావేశంలో 12 పథకాలకు సంబంధించి అందిన 110 దరఖాస్తులలో, పది పథకాలకు సంబంధించి 100 దరఖాస్తులను ఆమోదించడం జరిగిందన్నారు. వీటిలో సీవీడ్ కల్చర్ సాగుకు యూనిట్ ధర రూ.15 వేలు కాగా ఒక వెయ్యి యూనిట్లు అందుబాటులో ఉన్నాయని, 42 మంది దరఖాస్తు చేసుకోగా మంజూరు చేయడం జరిగిందన్నారు. ఐస్ బాక్స్‌తో మోటార్ సైకిళ్ళు యూనిట్ ధర రూ.75 వేలు కాగా 6 యూనిట్లు అందుబాటులో ఉండగా 17 దరఖాస్తులు అందాయని అర్హత కలిగిన 6 మందికి మంజూరు చేయడం జరిగింది అన్నారు. చేపల అమ్మకం కోసం ఇ-రిక్షాలు సహా ఐస్ బాక్స్‌తో కూడిన మూడు చక్రాల వాహనం యూనిట్ ధర రూ.3 లక్షలు కాగా 16 యూనిట్లు అందుబాటులో ఉన్నాయని అందిన ఐదు దరఖాస్తులను మంజూరు చేయడం జరిగిందన్నారు. సాంప్రదాయ మత్స్యకారులకు పడవలు, వలలు యూనిట్ ధర రూ.5 లక్షలు కాగా 80 యూనిట్లు అందుబాటులో ఉన్నాయని, దరఖాస్తు చేస్తున్న 13 మందికి మంజూరు చేయడం జరిగింది అన్నారు. చేపల కియోస్క్‌లు నిర్మాణాల యూనిట్ ధర రూ.10 లక్షలు కాగా 23 యూనిట్లు అందుబాటులో ఉన్నాయని వీటి ఏర్పాటుకు అందిన ఏడు దరఖాస్తులను ఆమోదించడం జరిగిందన్నారు. ఇన్సులేటెడ్ వాహనాలు యూనిట్ ధర రూ.20 లక్షలు కాగా 4 యూనిట్లు అందుబాటులో ఉన్నాయని వచ్చిన దరఖాస్తులలో నాలుగు దరఖాస్తులను ఆమోదించడం జరిగిందన్నారు. లైవ్ ఫిష్ వెండింగ్ సెంటర్స్ – స్టేషనరీ/కంటైనర్ / మొబైల్ యూనిట్ ధర రూ.20 లక్షలు కాగా ఐదు యూనిట్లు అందుబాటులో ఉన్నాయని, అందిన ఏడు దరఖాస్తుల్లో ఐదింటిని ఆమోదించడం జరిగిందన్నారు. ఫిష్ వాల్యూ యాడ్ ఎంటర్‌ప్రైజెస్ యూనిట్ ధర రూ.50 లక్షలు కాగా నాలుగు యూనిట్లు అందుబాటులో ఉన్నాయని, అందిన ఒక్క దరఖాస్తును ఆమోదించడం జరిగిందన్నారు. లార్జ్ ఆర్ ఏ ఎస్ – రీ-సర్క్యులేటరీ ఆక్వాకల్చర్ సిస్టమ్స్ స్థాపన యూనిట్ ధర రూ.50 లక్షలు కాగా, మూడు యూనిట్లు అందుబాటులో ఉన్నాయని అందిన ఒక్క దరఖాస్తును ఆమోదించడం జరిగిందన్నారు. ఫిష్ రిటైల్ హబ్ నిర్మాణం యూనిట్ ధర ఒక కోటి రూపాయలు కాగా అందుబాటులో నాలుగు యూనిట్లు ఉన్నాయని యూనిట్ స్థాపనకు అందిన ఒక దరఖాస్తును ఆమోదించడం జరిగిందని తెలిపారు.

ఈ సమావేశంలో రాష్ట్ర మత్స్యశాఖ జాయింట్ డైరెక్టర్ మరియు అప్సడ జిల్లా నోడల్ అధికారి పి.సురేష్, జిల్లా మత్స్యశాఖ సంయుక్త సంచాలకులు ఏ.నాగరాజు, డిఆర్డిఏ పిడి ఎంఎస్ఎస్ వేణుగోపాల్, ఫిషరీష్ ఏడీలు, ఎఫ్డివోలు, ఆక్వా రైతుల ప్రతినిధి వాతాడి కనకరాజు, తదితరులు పాల్గొన్నారు.