ఎస్ హెచ్ జి గ్రూపు సభ్యులు బ్యాంకు రుణాలను సద్వినియోగం చేసుకొని ఆర్థికంగా బలోపేతం కావాలి–జిల్లా కలెక్టర్ చదలవాడ నాగరాణి.

మంగళవారం కలెక్టరేట్ పీజిఆర్ఎస్ సమావేశ మందిరం నందు జిల్లా కలెక్టర్ అధ్యక్షతన డిఆర్డిఏ, పశుసంవర్ధక శాఖల సమన్వయ సమావేశాన్ని నిర్వహించడం జరిగింది. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ ఈ సంవత్సరం యాన్యువల్ క్రెడిట్ ప్లాన్ కింద జిల్లాకు 1,419 యూనిట్లు మంజూరు కావడం జరిగిందని, ఎస్ హెచ్ జి మహిళలు వీటి స్థాపన ద్వారా ఆర్థిక పురోభివృద్ధి సాధించాలన్నారు. పెరటి కోళ్లు, ఎద్దులు, దూడలు, పాడి గేదెలు, మేకలు పెంపకం యూనిట్లు, మినీ పౌల్ట్రీ ఫారం, గొర్రెల, పొట్టేళ్ల యూనిట్లు నెలకొల్పడం ద్వారా ఆర్థిక ప్రగతి సాధించాలని లబ్ధిదారులను కోరారు. వీటి కొనుగోలుకు బ్యాంకులు రుణాలు మంజూరు చేయడం జరుగుతుందన్నారు. జిల్లాలో పాల దిగుబడి తక్కువగా ఉందని, పాల దిగుబడి పెంచేందుకు మేలు జాతి ఆవులు, గేదెలు, కొనుగోలులో ప్రత్యేక శ్రద్ధ తీసుకోవాలని పశుసంవర్ధక శాఖ అధికారులను ఆదేశించారు. పక్క రాష్ట్రాల నుండి కాకుండా సమీప జిల్లాల నుండి, మన జిల్లా వాతావరణానికి అనువుగా ఉండే ఆవులు, గేదెలు, కొనుగోలు చేసి లబ్ధిదారులకు అందించాలన్నారు. వివిధ యూనిట్ల స్థాపన ద్వారా లబ్ధిదారులకు అదనపు ఆదాయం వచ్చే విధంగా అధికారులు వారికి ప్రత్యేక సూచనలు, సలహాలు అందించాలన్నారు. మన జిల్లా అభివృద్ధి రేటు తక్కువగా ఉందని, జిల్లాలో నూతన పరిశ్రమలు, వివిధ రంగాలలో నూతన యూనిట్లు స్థాపన ద్వారా వృద్ధిరేటు పెంచుకోవచ్చు అన్నారు. జిల్లాలో పశుసంవర్ధక శాఖ ద్వారా పాడి గేదెలు, ఆవులు, కోళ్లు, గొర్రెలు పెంపకం ద్వారా లబ్ధిదారులకు అదనపు ఆదాయం లభిస్తుంది అన్నారు. ఈ దిశగా అధికారులు ప్రత్యేక శ్రద్ధ తీసుకోవాలన్నారు. జిల్లాలో రసాయన ఎరువుల వినియోగాన్ని తగ్గించి సేంద్రియ సాగుకు ప్రోత్సహించాలని, రైతాంగానికి అవగాహన కల్పించాలని అధికారులకు సూచించారు.

ఈ సమావేశంలో డి ఆర్ డి ఎ పిడి ఎంఎస్ఎస్ వేణుగోపాల్, పశుసంవర్ధక శాఖ ఉపసంచాలకులు ఎల్.కె.సుధాకర్, జిల్లా పశుసంవర్ధక శాఖ అధికారి జవ్వాది హుస్సేన్, డిపిఎంలు ఎస్.కృష్ణకుమారి, డి.వెంకటేశ్వరరావు, ఎం.బాలాజీ, జిల్లాలోని అన్ని మండలాల వెటర్నరీ అసిస్టెంట్ సర్జన్లు, ఏపీఎంలు, తదితరులు పాల్గొన్నారు.