ఎంఎస్ఎంఇ, చేనేత, హస్తకళల ఉత్పత్తులకు జిఎస్టి తగ్గింపుపై ప్రజలకు విస్తృత అవగాహన కల్పించాలి–జిల్లా జాయింట్ కలెక్టర్ టి.రాహుల్ కుమార్ రెడ్డి.

సూపర్ జిఎస్టి….సూపర్ సేవింగ్స్ రెండవ వారం ప్రచార కార్యక్రమం అమలులో భాగంగా భీమవరం కలెక్టరేట్ ప్రాంగణంలో ఏర్పాటుచేసిన ఎంఎస్ఎంఈ, చేనేత, హస్తకళల ఉత్పత్తుల ప్రదర్శనను శుక్రవారం జిల్లా జాయింట్ కలెక్టర్ టి.రాహుల్ కుమార్ రెడ్డి సందర్శించారు. ఈ సందర్భంగా ఎగ్జిబిషన్లో ప్రదర్శించిన టేకు చెక్కతో తయారుచేసిన ఎడ్ల బండి, నాగలి, వివిధ దేవత మూర్తులు, చేనేత వస్త్రాలు, రెడీమేడ్ దుస్తులు, ప్యాకింగ్ మెటీరియల్ తదితర ఉత్పత్తులను పరిశీలించి జీఎస్టీ తగ్గింపునకు ముందు ప్రస్తుత ధర సంబంధించిన వివరాలు అడిగి తెలుసుకున్నారు. ఈ సందర్భంగా ఆయన మాట్లాడు జిఎస్టి తగ్గింపు ప్రచార కార్యక్రమాల్లో భాగంగా రెండవ వారం అక్టోబర్ మూడు, నాలుగు తేదీల్లో జిల్లా అంతటా ఎంఎస్ఎంఈ, చేనేత, హస్తకళల ఉత్పత్తుల ప్రదర్శనలను ఏర్పాటుచేసి అవగాహన కల్పించడం జరుగుతుంది అన్నారు. జీఎస్టీ తగ్గింపు ద్వారా పేద, మధ్యతరగతి వర్గాలకు కుటుంబానికి సుమారు నెలకు 2,500 నుండి 5 వేల వరకు ఆదా అవ్వడంతో పాటు వ్యాపారాలు కూడా పెరుగుతాయి అన్నారు. చేనేత ఉత్పత్తులపై జిఎస్టి తగ్గింపు ద్వారా చేనేత వస్త్రాలు చౌకగా లభిస్తాయన్నారు. చేనేత ఉత్పత్తిదారులకు పన్ను భారం తగ్గుతుంది అన్నారు. హస్త కళలకు సంబంధించిన వస్తువులపై జిఎస్టి ఐదు శాతానికి తగ్గడం వల్ల ఉత్పత్తులు చౌకగా లభిస్తాయన్నారు. జీఎస్టీ తగ్గింపు ద్వారా సూక్ష్మ,చిన్న,మధ్య తరహా పరిశ్రమలకు చెందిన ఉత్పత్తులు, చేనేత, హస్త కళలకు సంబంధించిన వస్తువుల ధరల తగ్గుదలపై ప్రజలకు తెలియజేసేందుకు మండల, గ్రామస్థాయిలో కూడా ఎగ్జిబిషన్స్ ఏర్పాటు చేసి అవగాహన కార్యక్రమాలు చేపట్టాలని సంబంధిత అధికారులను జాయింట్ కలెక్టర్ ఆదేశించారు.

ఈ సందర్భంలో డిఆర్ఓ బి.శివన్నారాయణ రెడ్డి, వాణిజ్య పన్నుల డిప్యూటీ కమిషనర్ కెపి శైలజ , జిల్లా పరిశ్రమల అధికారి యు.మంగపతి రావు, ఎల్డిఎం ఎ.నాగేంద్ర ప్రసాద్, జీఎస్టీ అసిస్టెంట్ కమిషనర్ వి.కేదారేశ్వరరావు, కార్పెంటర్లు, వడ్రంగి అసోసియేషన్ సభ్యులు, తదితరులు పాల్గొన్నారు.