అధికారులు ప్రతిరోజు విధిగా కొంత సమయం కేటాయించి క్షేత్రస్థాయిలో పర్యటించి సమస్యలను పరిష్కరించాలి–జాయింట్ కలెక్టర్ టి. రాహుల్ కుమార్ రెడ్డి

పిజిఆర్ఎస్ లో అందిన అర్జీలను అధికారులు క్షుణ్ణంగా పరిశీలించి నాణ్యమైన, శాశ్వత పరిష్కారం చూపాలి.

*సోమవారం జిల్లా కలెక్టరేట్ పిజిఆర్ఎస్ సమావేశ మందిరంలో జాయింట్ కలెక్టర్ టి. రాహుల్ కుమార్ రెడ్డితో పాటు డిఆర్ఓ బి.శివన్నారాయణ రెడ్డి, డ్వామా పిడి డా.కెసిహెచ్ అప్పారావు, జిల్లా వ్యవసాయ శాఖ అధికారి జెడ్.వెంకటేశ్వరరావు జిల్లాలో పలు ప్రాంతాల నుండి వచ్చిన ప్రజల నుండి ఫిర్యాదులను స్వీకరించారు. ఈరోజు వివిధ సమస్యల పరిష్కారానికి ప్రజలనుంచి 168 అర్జీలు అందాయి.

ఈ సందర్భంగా జాయింట్ కలెక్టర్ టి.రాహుల్ కుమార్ రెడ్డి మాట్లాడుతూ ప్రజా ఫిర్యాదుల పరిష్కారంపై ప్రభుత్వం ప్రత్యేక దృష్టి పెట్టిందని, పిజిఆర్ఎస్ లో ప్రజలు సమర్పించిన అర్జీల పరిష్కారానికి అధికారులు ప్రత్యేక శ్రద్ధ తీసుకోవాలని అధికారులను ఆదేశించారు. అధికారులు క్షేత్రస్థాయిలో ఫిర్యాదుదారులతో స్వయంగా మాట్లాడి నాణ్యమైన పరిష్కారాన్ని చూపాలన్నారు. శాఖల వారీగా వచ్చిన అర్జీలను పరిశీలించి తక్షణమే పరిష్కార చర్యలు చేపట్టాలన్నారు. అర్జీల పరిష్కారంలో బాధ్యతాయుతంగా వ్యవహరించాలని, నిర్లక్ష్యానికి తావు లేకుండా అధికారులు సమిష్టిగా పనిచేయాలని సూచించారు. క్షేత్రస్థాయిలో ఉత్పన్నమయ్యే సమస్యలకు క్షేత్ర స్థాయిలోనే నాణ్యమైన పరిష్కార మార్గాలు చూపించి అర్జీలు రీఓపెన్‌కు ఆస్కారం లేకుండా చూడాలన్నారు.

ఈరోజు పిజిఆర్ఎస్ కు అందిన ఫిర్యాదులలో ముఖ్యమైనవి కొన్ని ఈ విధంగా ఉన్నాయి.

పాలకొల్లుకు చెందిన గుబ్బల సత్యనారాయణ తణుకు చందపర్రు గ్రామంలో ఉన్న 1.25 సెంట్లు భూమిలో చేపలు చెరువు సాగు చేస్తున్నానని, ఈ భూమి 50 సంవత్సరాలు నుండి నా స్వాధీనంలో ఉందని, క్రమం తప్పకుండా పన్నులు చెల్లిస్తున్నానన్నారు. ఈమధ్య చేసిన రీసర్వేలో 1.19 సెంట్లు మాత్రమే చూపించారన్నారు. తిరిగి ఈ సర్వే చేయించి 1.25 సెంట్లు వన్ బి నందు నమోదు చేయాలని అర్జీని సమర్పించారు.

పెనుగొండ మండలం, రామన్నపాలెం గ్రామానికి చెందిన పసుపులేటి దుర్గ అర్జీని సమర్పిస్తూ ఇటీవల నిర్వహించిన రిసర్వేలో తనకు ఉన్న 60 సెంట్లు భూమిని 54 సెంట్లుగా చూపించారని, 6 సెంట్లు భూమి పక్క వారి పొలంలో కలిసిందని, మండల తహసిల్దార్ ను కలిసిన సమస్య పరిష్కారం కాలేదని, దయచేసి తిరిగి రీ సర్వే చేసి తన భూమి తనకు ఇప్పించాలని కోరారు.

దువ్వ గ్రామానికి చెందిన కుప్పాలా వెంకటరత్నం అర్జీని సమర్పిస్తూ తన వివాహ సమయంలో తన తండ్రి ఒక ఎకరం భూమిని పసుపు, కుంకుముగా ఇచ్చారని, అప్పటనుండి ఆ భూమి నా స్వాధీనంలోనే ఉందని, ఈమధ్య నా భూమిని ఆనుకొని ఉన్న దువ్వ ధానేశ్వరి అమ్మవారి దేవస్థానం వారు నా భూమిలో కొంత భాగం ఆక్రమించుకున్నారన్నారు. పలుమార్లు దేవస్థానం వారిని సంప్రదించగా సరిచేయలేదని, దానేశ్వరి దేవస్థానం వారు ఆక్రమించుకున్న భూమిని తిరిగి తనకు ఇప్పించాలని వినతిపత్రం సమర్పించారు.

ఇరగవరం మండలం, రాపాక నివాసి వెంకట నరసమ్మ (83) అర్జీని సమర్థిస్తూ, తనకు నలుగురు సంతానమని అందరినీ ప్రయోజకులను చేసి వివాహాలు జరిపించానన్నారు. తన భర్త 2018లో చనిపోయారని తన కొడుకులు చూడనందున గత ఆరు సంవత్సరాల నుండి నా కుమార్తెల వద్ద ఉంటున్నానన్నారు. తన పేరును ఉన్న 25 సెంట్లు భూమిపై వచ్చే పంట కూడా నన్ను తిననివ్వడం లేదని అన్నారు. ఆ భూమి తాలూకు దస్తావేజులు నా కొడుకులు తీసుకు వెళ్లిపోయారని, ప్రస్తుతం అనారోగ్యంతో బాధపడుతూ కుమార్తెలపై ఆధారపడి జీవిస్తున్ననన్నారు. దయచేసి తన పోషణకు, వైద్య ఖర్చులకు అవసరమయ్యే సొమ్మును తన కొడుకుల నుండి ఇప్పించాలని వినతిపత్రం సమర్పించారు.

పాలకోడేరు మండలం శృంగ వృక్షం గ్రామానికి చెందిన నార్న శ్రీనివాస్ జవ్వాది వారి వీధి నుంచి కొటికలపూడి వారి వీధి వరకు సందు ఆక్రమణలకు గురైందని సర్వే చేసి ఆక్రమణలు తొలగించాలని వినతిపత్రం సమర్పించారు.

పెనుగొండ గ్రామానికి చెందిన పితాని సత్యవతి వితంతు పింఛను మంజూరు చేయాలని అర్జీ సమర్పించారు.

పాలకోడేరు మండలం విస్సా కోడేరుకు చెందిన వంగవరపు ఏసేబు తనకు కళ్ళు సరిగ్గా కనిపించడం లేదని,వికలాంగ ధ్రువీకరణ పత్రం ఉందని, తనకు వికలాంగు పించను మంజూరు చేయాలని అర్జీని సమర్పించారు.

సమావేశంలో వివిధ శాఖల జిల్లా అధికారులు, వయోవృద్ధుల సంక్షేమ ట్రిపునల్ సభ్యులు మేళం దుర్గాప్రసాద్ తదితరులు పాల్గొన్నారు.