విద్యార్థులకు చిన్ననాటి నుండే పెద్దలను గౌరవించడం తల్లిదండ్రులు నేర్పించిన నాడు వయోవృద్ధుల సమస్యలు ఉత్పన్నం కావని జిల్లా కలెక్టర్ చదలవాడ నాగరాణి అన్నారు.

గురువారం భీమవరం బ్యాంక్ కాలనీలోని శ్రీకృష్ణదేవరాయ సాంస్కృతిక సమితి ఫంక్షన్ హాల్ నందు జిల్లా వయోవృద్ధుల సంక్షేమ శాఖ ఆధ్వర్యంలో నిర్వహించిన అంతర్జాతీయ వయోవృద్ధుల దినోత్సవ వేడుకలకు జిల్లా కలెక్టర్ చదలవాడ నాగరాణి ముఖ్యఅతిథిగా పాల్గొన్నారు. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ వృద్ధులు అంటే జాతీయ సంపదగా నిర్వచించారు. ఇంట్లో వృద్ధులు ఉండడం గొప్పగా అనుభూతి చెందాలని, వారి అనుభవం, ఆసరా, పెద్దరికం ప్రతి ఒక్క కుటుంబానికి వెన్నుదన్నుగా ఉంటాయన్నారు. భారతీయ సంస్కృతిలో తల్లిదండ్రులకు, గురువులకు ప్రత్యేక స్థానం ఉందన్నారు. ప్రస్తుత సమాజంలో చిన్న కుటుంబాలుగా మారడం, కొంత విలువలకు ప్రాధాన్యత తగ్గడంతో వృద్ధులను ఇబ్బందులకు గురిచేస్తున్నారని ఇది సరైనది కాదన్నారు. ప్రతి ఒక్కరూ వారి బాల్యంలో తల్లిదండ్రులు చేసిన సేవలను చిరస్థాయిగా గుర్తించుకోవాల్సిన అవసరం ఎంతైనా ఉందని, వారు వృద్ధాప్యంలో ఉన్నప్పుడు వారిని జాగ్రత్తగా చూసుకోవాల్సిన అవసరం కూడా అంతే ఉందన్నారు. తల్లిదండ్రుల, వృద్ధుల హక్కుల కోసం చట్టాన్ని అమలు చేయవలసిన బాధ్యత ప్రతి ఒక్కరి పైన ఉందన్నారు. వయా వృద్ధులకు ఏ సమస్య ఉన్న జిల్లా యంత్రాంగం అండగా ఉంటుందని, ఎవరైనా వృద్ధులను నిరాధారణకు గురిచేసిన, హింసకు గురిచేసినా అటువంటి సమాచారం తెలిస్తే అధికారుల ద్వారా పర్యవేక్షించి సంబంధిత వ్యక్తులపై స్వచ్ఛందంగా చర్యలు తీసుకోవడం జరుగుతుందని హెచ్చరించారు. కేంద్ర ప్రభుత్వం ఆదేశాల మేరకు రాష్ట్ర ప్రభుత్వం సూచనలతో జిల్లాలో వృద్ధాశ్రమాల నిర్మాణానికి ప్రతిపాదనను కేంద్రానికి పంపడం జరిగిందని తెలిపారు. మరిన్ని ప్రాంతాలను గుర్తించి ప్రతిపాదనలను సిద్ధం చేయాలని జిల్లా వయోవృద్ధుల సంక్షేమ శాఖ అధికారిని ఆదేశించారు. ఉమ్మడి పశ్చిమగోదావరి జిల్లాలకు సంయుక్తంగా జిల్లా వయోవృద్ధుల సంక్షేమ శాఖ అధికారి కార్యాలయం ఏలూరులో ఉండటం కారణంగా పశ్చిమగోదావరి జిల్లాలో అధికారి అందుబాటులో లేని ఇబ్బందిని పరిష్కార మార్గంగా వారానికి రెండు రోజులు గురు, శుక్ర వారాల్లో కచ్చితంగా భీమవరం జిల్లా కలెక్టరేట్లో అందుబాటులో ఉండి వృద్ధులకు సర్వీస్ లను అందజేయాల్సిందిగా ఆ శాఖ సహాయ సంచాలకులను ఆదేశించారు. జిల్లాలోని పట్టణ పార్కులు యందు వృద్ధులకు ప్రాధాన్యతనిస్తూ వాకింగ్ ట్రాక్ లను, సిట్టింగ్ బెంచీలను ఏర్పాటుకు చర్యలు తీసుకోవడం జరిగిందన్నారు. వయోవృద్ధుల పాదాలకు నమస్కారాలు తెలియజేస్తున్న అంటూ జిల్లా కలెక్టర్ ప్రసంగాన్ని ముగించారు.

వయోవృద్ధుల సంక్షేమ సంఘం కార్యవర్గం సభ్యులు పలువురు మాట్లాడుతూ ప్రతి ఒక్కరూ తల్లిదండ్రులు, వృద్ధులు పోషణ చట్టంపై అవగాహన కలిగి ఉండాలన్నారు. ఏదైనా వృద్ధులకు సంబంధించి సంఘటన జరిగినప్పుడు జిల్లా యంత్రాంగం సుమోటోగా తీసుకోని తగిన చర్యలు తీసుకోవాలని కోరారు. కళాశాలలో, పాఠశాలలో విద్యార్థులకు తల్లిదండ్రులను గౌరవించడంపై అవగాహన కార్యక్రమాలను నిర్వహించాలని కోరారు. ఈ సందర్భంగా కొన్ని సమస్యలను జిల్లా కలెక్టర్ కు విజ్ఞప్తి చేశారు.

చట్ట సవరణ జరిగిన.. తల్లిదండ్రుల, వృద్ధుల పోషణ మరియు సంక్షేమ చట్టం 2007 మరియు 2011 ఆంధ్రప్రదేశ్ తల్లిదండ్రుల, వృద్ధుల పోషణ మరియు సంక్షేమ నియమావళి పై అవగాహన కరదీపికను జిల్లా కలెక్టర్ చదలవాడ నాగరాణి చేతుల మీదుగా ఆవిష్కరించారు.

జిల్లా నలుమూలల నుండి వచ్చిన సంఘ నాయకులలో విశిష్ట సేవలు అందించిన వారిలో కొంతమందిని ఎంపికచేసిన వారికి చివరగా జిల్లా కలెక్టర్ చేతులమీదుగా శాలువా, పూలమాలతో సత్కరించి జిల్లా స్థాయిలో అవార్డులు ప్రధానం చేయడం జరిగింది.

ఈ కార్యక్రమంలో జిల్లా విభిన్న ప్రతిభావంతులు, వయవృద్ధుల సంక్షేమ శాఖ సహాయ సంచాలకులు బి.రామ్ కుమార్, జిల్లా సీనియర్ సిటిజన్స్ వెల్ఫేర్ సొసైటీ అధ్యక్షులు అడ్డాల నాగ సూర్య సత్యనారాయణ, శ్రీకృష్ణదేవరాయ సాంస్కృతిత సమితి కార్యదర్శి మెంటే పార్థసారథి, సీనియర్ సిటిజన్స్ ట్రిబ్యునల్ అధికారి దాయన సురేష్ చంద్రజీ, వయోవృద్ధుల జిల్లా అప్పిలేట్ ట్రిబ్యునల్ మెంబెర్ మేళం దుర్గాప్రసాద్, రాష్ట్ర సీనియర్ సిటిజన్స్ వెల్ఫేర్ అసోసియేషన్ ప్రధాన కార్యదర్శి కుసునూరి రామచంద్రరావు, సంయుక్త కార్యదర్శి వీకే వీర రాఘవరావు, జిల్లా ప్రధాన కార్యదర్శి కోటికలపూడి చిట్టివెంకయ్య, భీమవరం సంఘం సహా అధ్యక్షులు ప్రొఫెసర్ మట్లపొడి సత్యనారాయణ, ప్రధాన కార్యదర్శి బోనం పాండు రంగారావు, శ్రీ విజ్ఞానం వేదిక కన్వీనర్ చెరుకువాడ రంగ సాయి, తదితరులు పాల్గొన్నారు.