రైతుల సమస్యల పరిష్కారానికి జిల్లా కలెక్టరేట్, రెవిన్యూ డివిజనల్ కార్యాలయాల్లో కంట్రోల్ రూములు ఏర్పాటు.

జిల్లాలో తొలి ఖరీఫ్ సీజన్ ధాన్యం కొనుగోలు కేంద్రం అక్టోబర్ 27న తాడేపల్లిగూడెంలో ప్రారంభం…

ధాన్యం కొనుగోలులో రైతులకు ఎటువంటి ఇబ్బందులు లేకుండా అధికారులు పటిష్టమైన ఏర్పాట్లు చేయాలి.

……జిల్లా జాయింట్ కలెక్టర్ టి. రాహుల్ కుమార్ రెడ్డి.

మంగళవారం కలెక్టరేట్ పిజిఆర్ఎస్ సమావేశ మందిరం నుండి రెవిన్యూ డివిజనల్ అధికారులు, తహసిల్దార్లు, వ్యవసాయ శాఖ అధికారులతో ఖరీఫ్ సీజన్లో ధాన్యం కొనుగోలు ఏర్పాట్లపై జాయింట్ కలెక్టర్ టి.రాహుల్ కుమార్ రెడ్డి గూగుల్ మీట్ ద్వారా సమీక్షించారు. ఈ సందర్భంగా జిల్లా జాయింట్ కలెక్టర్ మాట్లాడుతూ అక్టోబర్ 27వ తేదీన తాడేపల్లిగూడెంలో దాన్యం కొనుగోలు కేంద్రాన్ని ప్రారంభించడం జరుగుతుందన్నారు. ధాన్యం సేకరణ ప్రారంభం కానున్న దృష్ట్యా సంబంధిత అధికారులు సత్వరమే ఏర్పాట్లు పూర్తి చేయాలన్నారు. రైతు సేవా కేంద్రాలలో 50 శాతం గోనె సంచులు సిద్ధం చేయాలన్నారు. మండల స్థాయిలో రైతులు, మిల్లర్లతో సమావేశాలు ఏర్పాటు చేసి ధాన్యం సేకరణకు సంబంధించి అవగాహన కల్పించాలన్నారు. ప్రతి రైతు సేవా కేంద్రంలో గన్నిస్ రిజిస్ట్రేషన్లను ప్రారంభించి రైతులకు ఇస్తున్న సంచుల వివరాలు నమోదు చేయాలన్నారు. రైతులకు తప్ప దళారులకు ఎవరికైనా గోని సంచులు ఇచ్చినట్లు తెలిస్తే సంబంధిత వారిపై కఠిన చర్యలు తీసుకోవడం జరుగుతుందన్నారు. ఈసారి రైతులు అవసరమైతే వారి సొంత వాహనంలో ధాన్యాన్ని రైతు సేవా కేంద్రానికి తరలించుకునేందుకు అవకాశం కల్పించడం జరిగిందన్నారు. ధాన్యం సేకరణ సమయంలో రైతుల సమస్యల పరిష్కారానికి కలెక్టరేట్లో కంట్రోల్ రూమ్ ఏర్పాటు చేయడం జరుగుతుందన్నారు. రెవెన్యూ డివిజనల్ కార్యాలయాలలో కూడా కంట్రోల్ రూమ్ లు ఏర్పాటు ఏర్పాటు చేయాలని ఆర్డీవోలను ఆదేశించారు. ధాన్యం కొనుగోలు సందర్భంగా రైతులకు ఎటువంటి అసౌకర్యం, ఇబ్బందులు లేకుండా అన్ని ఏర్పాట్లు పూర్తిచేసి తమకు నివేదిక పంపించాలని సంబంధిత అధికారులను జాయింట్ కలెక్టర్ టి. రాహుల్ కుమార్ రెడ్డి ఆదేశించారు.

అనంతరం జిల్లాలో యూరియా నిల్వలు, రాబోయే మూడు నెలల కాలంలో అవసరమయ్యే ఎరువులపై సంబంధిత అధికారులతో సమీక్షించారు. ఈ సందర్భంగా మాట్లాడుతూ జిల్లాలో ప్రతి ఫెర్టిలైజర్ షాపును తనిఖీ చేసి స్టాక్ వివరాలు, అమ్మకం వివరాలు అన్నీ సక్రమంగా ఉన్నాయా లేదా అని పరిశీలించాలని ఆదేశించారు. స్టాకుకు, అమ్మకాలకు సంబంధించి ఎటువంటి వ్యత్యాసాలు ఉన్నా కేసులు నమోదు చేయాలన్నారు. ప్రతి మండలంలో ప్రతినెల రైతులకు ఎంత మేరకు యూరియా అవసరం ఉంటుందో నివేదికను సమర్పించాలని వ్యవసాయ శాఖ అధికారులను జాయింట్ కలెక్టర్ ఆదేశించారు. ఫెర్టిలైజర్స్ హోల్ సేల్ డీలర్స్, రిటైలర్స్ తో జిల్లాస్థాయి, మండల స్థాయి ఫెర్టిలైజర్స్ కమిటీ సమావేశాలు ఏర్పాటు చేసి యూరియా పై అవగాహన కల్పించాలన్నారు. యూరియా ఆక్వా సాగుకు వినియోగించుకోకుండా తహాసిల్దార్లు పర్యవేక్షించాలన్నారు. రైతులు తమ అవసరాలకు మాత్రమే యూరియా కొనుగోలు చేయాలని, అవసరం లేకపోయినా కొనుగోలు చేసి నిల్వ చేయకూడదన్నారు. జిల్లా కలెక్టరేట్లో కంట్రోల్ రూమ్ ఏర్పాటు చేయడం జరుగుతుందని, ఏమైనా సమస్యలు ఉంటే కంట్రోల్ రూమ్ కు తెలియజేసి పరిష్కరించుకోవచ్చు అన్నారు.

ఈ గూగుల్ మీట్లో జిల్లా వ్యవసాయ శాఖ అధికారి జెడ్ వెంకటేశ్వరరావు, డీఎస్ఓ ఎన్.సరోజ, సివిల్ సప్లయిస్ కార్పొరేషన్ జిల్లా మేనేజర్ ఎండి ఇబ్రహీం, జిల్లా సహకార శాఖ అధికారి మురళీకృష్ణ, ఏ ఎస్ ఓ ఎం.రవిశంకర్, తదితరులు పాల్గొన్నారు.