ప్రపంచ దేశాలు మెచ్చే విధంగా పరిశుభ్రతలో భారతదేశం తలమానికంగా నిలిపేందుకు ప్రజల సహాయ సహకారాలు ఎంతో అవసరమని కేంద్ర ఉక్కు, భారీ పరిశ్రమల శాఖ సహాయ మంత్రి భూపతి రాజు శ్రీనివాస్ వర్మ అన్నారు.

సోమవారం జిల్లా కలెక్టరేట్ పెరేడ్ గ్రౌండ్ నందు నిర్వహించిన జిల్లా స్థాయి స్వచ్ఛ ఆంధ్ర అవార్డ్స్ ప్రధానోత్సవం కార్యక్రమానికి కేంద్ర ఉక్కు, భారీ పరిశ్రమల శాఖ సహాయ మంత్రి భూపతి రాజు శ్రీనివాస్ వర్మ ముఖ్యఅతిథిగా పాల్గొన్నారు. ఈ కార్యక్రమంలో రాజ్యసభ సభ్యులు పాక వెంకట సత్యనారాయణ, జిల్లా కలెక్టర్ చదలవాడ నాగరాణి, స్థానిక శాసనసభ్యులు మరియు పిఎసి చైర్మన్ పులపర్తి రామాంజనేయులు, జిల్లా జాయింట్ కలెక్టర్ టి.రాహుల్ కుమార్ రెడ్డి, ఏఎంసీ చైర్మన్ కలిదిండి సుజాత, కృష్ణ బలిజ కార్పొరేషన్ చైర్మన్ గంట త్రిమూర్తులు, తదితరులు పాల్గొన్నారు.

ఈ సందర్భంగా కేంద్ర ఉక్కు, భారీ పరిశ్రమల శాఖ సహాయ మంత్రి భూపతి రాజు శ్రీనివాస్ వర్మ మాట్లాడుతూ స్వచ్ఛత విషయంలో భారతదేశాన్ని ప్రపంచ దేశాలు చెప్పుకునే అంత మార్పు ప్రజల సహాయ సహకారాలతోనే సాధ్యమన్నారు. భారతదేశం అన్ని రంగాల్లో ప్రపంచ దేశాలతో పోటీ పడుతుందని దీనితోపాటు పరిశుభ్ర భారత్ అనేటువంటి ఆరోగ్యవంతమైన భారతదేశం కావాలన్నారు. గ్రామీణ స్వరాజ్యం కావాలి, భారత దేశంలో మార్పు రావాలి, భారత దేశంలో స్వచ్ఛత అనేటువంటి నినాదాన్ని ఆ రోజుల్లోనే ప్రారంభించిన వ్యక్తి జాతిపిత మహాత్మా గాంధీ అన్నారు. 2014 లో భారత్ ప్రధానమంత్రిగా నరేంద్ర మోడీ బాధ్యతలు స్వీకరించిన తరువాత అక్టోబర్ 2 గాంధీ జయంతి నాడు స్వచ్ఛభారత్ ఉద్యమానికి పెద్ద ఎత్తున దేశంలో శ్రీకారం చుట్టడం జరిగిందన్నారు. పరిశుద్ధ భారతదేశం కావాలి, దీనికి ప్రజల్లో పెద్ద ఎత్తున చైతన్యం తీసుకురావాలనే టటువంటి ఆలోచన భారత ప్రధాని నరేంద్ర మోడీ చేయడం జరిగిందన్నారు. ఈ దేశంలో ప్రముఖ నాయకులు చాలామంది స్వచ్ఛభారత్ కార్యక్రమం స్వీకరించి పెద్ద ఎత్తున పారిశుద్వానికి ప్రాధాన్యత ఇవ్వడం జరిగిందని తెలిపారు. ఒక ఆరోగ్యవంతమైనటువంటి భారతదేశ నిర్మాణం జరగాలి, రాబోయేటువంటి భవిష్యత్ తరాలు వారందరికీ కూడా ఆరోగ్యవంతులుగా ఉండాలని తీసుకున్నటువంటి కార్యక్రమం స్వచ్ఛభారత్ అన్నారు. ఆంధ్రప్రదేశ్లో పెద్ద ఎత్తున 2014లో అప్పటి ముఖ్యమంత్రి చంద్రబాబు నాయుడు నాయకత్వంలో స్వచ్ఛ ఆంధ్ర ప్రదేశ్ రాష్ట్రంలో తీసుకురావడం జరిగిందన్నారు. దీనిలో భాగంగా గ్రామాలకి టెక్నాలజీ కనుగొనడం, అనేక వాహనాలను తీసుకురావడం జరిగిందన్నారు. స్వచ్ఛ ఆంధ్ర కార్యక్రమాన్ని పురస్కరించుకుని నేడు దాదాపు చాలా విభాగాల్లో కొంతమందిని ఎంపిక చేసి అవార్డులను ఇచ్చేటటువంటి కార్యక్రమానికి రాష్ట్రవ్యాప్తంగా శ్రీకారం చుట్టడం జరిగిందన్నారు. అంగన్వాడీ కేంద్రాలు, ప్రభుత్వాసుపత్రిలు, ప్రభుత్వ కార్యాలయాలు, స్వచ్ఛ మున్సిపాలిటీలు, గ్రీన్ అంబాసిడర్లు, కొన్ని స్వచ్ఛంద సంస్థలు, ఇలా పలు విభాగాల్లో ఎంపిక చేసి వారికి అవార్డులు ఇవ్వడం ద్వారా మరింతగా ప్రోత్సాహించాలనే ఉద్దేశంతో అవార్డులకి రాష్ట్రంలో శ్రీకారం చుట్టడం జరిగిందన్నారు. సన్మానించడం, ప్రోత్సహించడం ద్వారా రాబోయేటువంటి రోజుల్లో వారు మరింత ఉత్సాహంగా తీసుకుంటారని, వారు మిగతా వారికి మార్గదర్శకం కావాలని ఏర్పాటు చేయడం జరిగిందన్నారు. ఇది కేవలం నినాదంతో మిగిలి పోకూడదనేటువంటి విషయాన్ని మనం అంతా కూడా గమనించాలిని, స్వచ్ఛత భారతదేశంలో ఈ విధంగా ఉంటుంది అనేటువంటి విషయం ప్రపంచ దేశాలు చెప్పుకునేలాగా ఉండాలన్నారు. ఇవాళ ప్రపంచ దేశాలతో పోటీపడుతూ మిగతా దేశాలకు మార్గదర్శకంగా ఉండాలంటే ఉపన్యాసాల ద్వారా, నినాదాలు ద్వారా మాత్రమే సాధ్యం కాదు అనేటటువంటి విషయాన్ని ఈ సందర్భంగా మనం అంతా కూడా గుర్తు తెచ్చుకొని, రాబోయేటువంటి రోజుల్లో ఈ విషయాన్ని మనం శ్రద్ధ చూపెట్టాల్సినటువంటి అవసరం ఎంతైనా ఉందన్నారు. నేడు మన జిల్లా కలెక్టర్ రాష్ట్రంలోనే సమర్థవంతమైన కలెక్టర్ గా నిలుస్తున్నారని, అన్ని జిల్లాల్లో యూరియా కొరత ఉంటే ఆంధ్ర ప్రదేశ్ రాష్ట్రంలో పశ్చిమగోదావరి జిల్లా మాత్రమే యూరియ కొరత లేకుండా ముందస్తు చర్యలు తీసుకున్నందుకు ఈ సందర్భంలో జిల్లా కలెక్టర్ ను ప్రత్యేకంగా అభినందించారు.

రాజ్యసభ సభ్యులు పాకా వెంకట సత్యనారాయణ మాట్లాడుతూ 2014 సంవత్సరంలో నరేంద్ర మోడీ ప్రధాని అయిన తర్వాత స్వచ్ఛ భారత్ పై సంకల్పించారని ఆ సంకల్పమే 10 సంవత్సరాల కాలంలో దేశంలో పారిశుధ్య పరిస్థితులలో ఎంతో మార్పు వచ్చిందన్నారు. దేశంలో కిడ్నీ, లివర్ వ్యాధులు పెరిగిపోతున్నాయని ముఖ్యంగా ఉభయ గోదావరి జిల్లాల్లో క్యాన్సర్ మహమ్మారి విస్తరిస్తుందని వాటి నివారణకు ప్రతి ఒక్కరు ఆలోచన చేయాలన్నారు. పారిశుధ్య కార్మికులు నిర్వహిస్తున్న సేవలకు మనమంతా రుణపడి ఉండాలన్నారు. ఆరోగ్యవంతమైన సమాజం కోసం ప్రతి ఒక్కరూ సామాజిక బాధ్యతగా స్వీకరించాలన్నారు

జిల్లా కలెక్టర్ చదలవాడ నగరాన్ని మాట్లాడుతూ స్వచ్ఛ భారత్ సర్వేక్షణ అవార్డ్స్ మాదిరిగానే, స్వచ్చ ఆంధ్ర అవార్డ్స్ కూడా స్వచ్ఛతా కార్యకలాపాల్లో అద్భుత ప్రదర్శన చూపిన వారిని గుర్తించి, అన్ని వర్గాలను స్వచ్ఛత స్ఫూర్తిని అందించడానికి, ప్రోత్సహించడమే లక్ష్యంగా రూపొందించబడ్డాయన్నారు. స్వచ్ఛత మన సంస్కృతి, నాగరికతలతో ఒక భాగంగా ఉండే విధంగా అలవర్చుకోవాల్సిన అవసరం ఎంతైనా ఉందన్నారు. ఈ రోజు స్వచ్ఛ ఆంధ్ర అవార్డ్స్ 2025 జిల్లా స్థాయి పురస్కార వేడుకను నిర్వహించడం చాలా గర్వకారణంగా ఉందన్నారు. స్వచ్ఛ ఆంధ్ర అవార్డ్స్ కేవలం పోటిగా కాకుండ చేయవలసిన స్వచ్ఛత, స్థిరత్వం, గౌరవం తో కూడిన ఉద్యమం అని, ఇది ప్రతి మనిషి కలిసి కట్టుగా చేయాలన్నారు. మన ముఖ్యమంత్రి విజన్, పట్టుదల కారణంగా స్వచ్ఛ్ ఆంధ్ర ఆశయాలపై మన రాష్ట్రం మొదటిసారి గ్రామాలు, పట్టణాలు, పాఠశాలలు, హాస్టల్స్, పరిశ్రమలు, తదితర 16 అంశాలలో రాష్ట్ర స్థాయి స్వచ్ఛత సర్వే నిర్వహించడం జరిగిందని, ఇది భారతదేశంలోనే మొట్టమొదటిగా చేపట్టిన ఆపరిశుభ్రతపై సర్వే అన్నారు. అన్ని గ్రామ పంచాయతీలు, పాఠశాలలు, హాస్పిటల్స్, పరిశ్రమలు స్వచ్ఛత కోసం ప్రేరణ కల్పించుకోవడం ముఖ్య ఉద్దేశం అన్నారు. మనకి 490 గ్రామపంచాయతీలు ఉన్నాయని, వీటిలో 384 గ్రామపంచాయతీలలో వర్మీ కంపోస్ట్ కేంద్రాలను నిర్వహించుకుంటున్నాం అన్నారు. వర్మీ కంపోస్ట్ తయారీలో మహిళలను భాగస్వాములు చేయడం జరిగిందన్నారు. జిల్లాలో గల ఘన వ్యర్థ నిర్వహణ కేంద్రాలలో మొత్తం 44,572 కిలోల వర్మీ కంపోస్ట్ ఉత్పత్తి చేయడం ద్వారా రూ.3,56,576/- ఆదాయం లభించిందనీ, అదనంగా 39,529 కిలోల ఘన వ్యర్థాలను విక్రయించుట ద్వారా రూ.2,76,703/- ఆదాయం వచ్చిందన్నారు. పురపాలక సంఘాల పరిధిలో స్వచ్ఛతపై జనవరి నెలలో అవగాహన కార్యక్రమాలు నిర్వహించుకున్నామన్నారు. ఫిబ్రవరి నెలలో అన్ని మున్సిపాలిటీలు ఇంటి వద్దనే వ్యర్ధాలు వేరుచేసి అందజేయడంపై ప్రజలకు అవగాహన కల్పించడం, మార్చి నెలలో సింగిల్ యూస్ ప్లాస్టిక్ నిషేధం వాటి స్థానంలో ప్రత్యామ్నాయ వస్తువులు వినియోగించుకోవడం, సింగిల్ యుజ్డ్ ప్లాస్టిక్ వస్తువులు వాడకాన్ని మన జిల్లాలో నిషేధించి, మన కలెక్టరేట్ నుంచి మొదలుపెట్టుకొని అన్ని ప్రభుత్వ కార్యాలయాల్లో, హోటల్స్, రెస్టారెంట్స్ ఫంక్షన్ హాల్స్, వాణిజ్య సముదాయాలు, అన్ని బహిరంగ ప్రదేశాల్లోనూ ఈ యొక్క సింగిల్ యుజ్డ్ ప్లాస్టిక్ అనేది ఉండకూడదని చెప్పడం జరిగిందన్నారు. రాష్ట్ర ముఖ్యమంత్రి నారా చంద్రబాబునాయుడు తణుకు బాయ్స్ హై స్కూల్ కార్యక్రమంలో పాల్గొన్న సందర్భంలో గుహామిత్ర యాప్ ను ప్రారంభించడం కూడా జరిగిందన్నారు. ఖాళీ స్థలంలో మొక్కలు నాటించే కార్యక్రమాలను కూడా మన జిల్లాలో విస్తృతంగా చేపట్టడం జరిగిందన్నారు. ఈ స్వర్ణాంధ్ర కార్యక్రమాన్ని నిజమైన ప్రజా ఉద్యమంగా జరుపుకోవడానికి ప్రజలందరూ కృషి చేయాలన్నారు. ప్రతి స్థానిక సంస్థ, ప్రతి పౌరుడు చురుకుగా పాల్గొనాలని విజ్ఞప్తి చేశారు. స్వచ్ఛత అంటే ఒక్క రోజు పని కాదని, ప్రతి రోజు మనం కలసి అనుసరించాల్సిన అలవాటు అని, దీని ద్వారా ఆరోగ్యవంతమైన, పచ్చని ఆంధ్రప్రదేశ్ రుపొందించగలమని కలెక్టర్ పిలుపునిచ్చారు.

భీమవరం శాసనసభ్యులు మరియు పిఎసి చైర్మన్ పులపర్తి రామాంజనేయులు మాట్లాడుతూ ఆరోగ్యమే మహాభాగ్యమని, ఆరోగ్యంగా ఉంటేనే ఏ కార్యక్రమమైనా విజయవంతం అవుతుందన్నారు. వ్యక్తిగత పరిశుభ్రతతో పాటు పరిసరాలను కూడా పరిశుభ్రంగా ఉంచుకోవాల్సిన బాధ్యత మనపై ఉందన్నారు. ఏ ఒక్కరూ చెత్తను రోడ్లపై వేయరాదని, చెత్తను తీసుకువెళ్లే వాహనం వచ్చినప్పుడు మాత్రమే వారికి అందించాలన్నారు. భీమవరం మున్సిపాలిటీ స్వచ్ఛ మున్సిపాలిటీగా అవార్డు వచ్చినందుకు మున్సిపల్ కమిషనర్ను అభినందించారు. ప్రతి ఒక్కరు మొక్కలను పెంచి పర్యావరణాన్ని కాపాడాలని అప్పుడే ప్రతి ఒక్కరూ ఆరోగ్యంగా జీవించగలుగుతారన్నారు. ప్లాస్టిక్ నిషేధాన్ని ప్రతి ఒక్కరూ సామాజిక బాధ్యతగా తీసుకోవాలన్నారు.

ముందుగా తాడేపల్లిగూడెంకు చెందిన వీర్నాల గౌరి కళాబృందం పరిసరాల పరిశుభ్రత, ప్లాస్టిక్ నిషేధం, మొక్కల పెంపకం పై ఇచ్చిన ప్రదర్శన అందరిని ఆకట్టుకున్నది. భీమవరం జి. ఎల్.బి మున్సిపల్ బాలికల ఉన్నత పాఠశాల విద్యార్థినిలు పరిసరాల పరిశుభ్రతపై ఇచ్చిన సందేశాత్మక ప్రదర్శన ప్రశంసలు అందుకుంది.

స్వచ్ఛ్ ఆంధ్ర కార్యక్రమంలో భాగంగా భీమవరం పురపాలక సంఘంతో లైన్స్ క్లబ్ సంయుక్తంగా స్వచ్ఛత కార్యక్రమాల నిర్వహణకు అవగాహన ఒప్పందం(MOU) చేసుకోవడం జరిగింది.

ఈ కార్యక్రమంలో జాయింట్ కలెక్టర్ టి.రాహుల్ కుమార్ రెడ్డి, అడిషనల్ ఎస్పీ వి. భీమారావు, డిఆర్ఓ బి.శివన్నారాయణ రెడ్డి, ఆర్డీవోలు కె. ప్రవీణ్ కుమార్ రెడ్డి, దాసిరాజు, ఖదిబ్ కైసర్ బానో, డిపిఓ ఎం రామనాథరెడ్డి, భీమవరం మున్సిపల్ కమిషనర్, కె. రామచంద్రారెడ్డి, వివిధ శాఖల జిల్లా అధికారులు,స్వచ్ఛ్ ఆంధ్ర అవార్డు గ్రహీతలు, విద్యార్థిని, విద్యార్థులు, ప్రజలు తదితరులు పాల్గొన్నారు.