పేరుపాలెం, కేపీ పాలెం బీచ్ సందర్శికుల రక్షణకు ముందస్తు పటిష్ట చర్యలు చేపట్టాలని జిల్లా కలెక్టర్ చదలవాడ నాగరాణి సంబంధిత అధికారులను ఆదేశించారు.

మంగళవారం కలెక్టరేట్ వశిష్ట సమావేశ మందిరం నందు జిల్లా కలెక్టర్ అధ్యక్షతన బీచ్ సందర్శకుల రక్షణ ఏర్పాట్లపై జిల్లా స్థాయి సమీక్ష సమావేశాన్ని నిర్వహించడం జరిగింది. సమావేశంలో జిల్లా ఎస్పీ అద్నాన్ నయీం అస్మి కూడా పాల్గొన్నారు. నరసాపురం, మొగల్తూరు మండలాల్లోని బీచ్ ల సందర్శకులు ప్రమాదాల బారినపడి ప్రాణాలు కోల్పోకుండా అవసరమైన ముందస్తు చర్యలను సంబంధిత కమిటీ సభ్యులతో సమీక్షించారు. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ పేరుపాలెం బీచ్ పర్యాటకులకు చాలా ప్రసిద్ధి చెందిందని, వారాంతాల్లో, ప్రభుత్వ సెలవు దినాలలో వివిధ ప్రాంతాల నుండి పెద్ద సంఖ్యలో పర్యాటకులు వస్తారన్నారు. సందర్శకులు అలల లోతు గమనించక పేరుపాలెం బీచ్‌లో పదేపదే మునిగిపోవడం జరుగుతుందన్నారు. కొంతమంది మద్యం సేవించి బీచ్ లో స్నానానికి దిగడం కూడా ఒక కారణంగా ఉందన్నారు. మెరైన్ పోలీసులు ఎప్పటికప్పుడు హెచ్చరికలు జారీ చేస్తూ, బీచ్ సందర్శకులను అప్రమత్తం చేయడంతో పాటు, వారి భద్రతకు పటిష్టమైన చర్యలను చేపట్టాలన్నారు. పెరుపాలెం బీచ్‌లోని స్థానిక లా & ఆర్డర్ పోలీసులతో డ్రంక్ అండ్ డ్రైవ్ పరీక్షలను కూడా నిర్వహించాలన్నారు. సముద్రంలోకి వేటకు వెళ్లే మత్స్యకారులు తప్పనిసరిగా బయోమెట్రిక్ గుర్తింపు కార్డులను తీసుకువెళ్లాలన్నారు. బీచ్ పెట్రోలింగ్ కోసం టెర్రైన్ వాహనాలు కొనుగోలుకు చర్యలు చేపట్టినట్లు తెలిపారు. బీచ్‌లలో ప్రొఫెషనల్ లైఫ్ గార్డుల నియామకానికి ఆలోచన చేస్తున్నట్లు తెలిపారు. అలాగే మొగల్తూరు మండలం పెరుపాలెం బీచ్‌లో కొత్త కోస్టల్ సెక్యూరిటీ పోలీస్ స్టేషన్ కోసం భూమిని సేకరించాలని తగు ఆదేశాలు జారీ చేశారు. మత్స్యకారులు వేటకు వెళుతున్న సందర్భంలో కొంతమంది ఆకతాయి సందర్శకులు మత్స్యకారులకు ఇబ్బంది కలిగిస్తున్నట్లు నా దృష్టికి వచ్చిందని, అటువంటి వారిపై కఠిన చర్యలు ఉంటాయని హెచ్చరించారు. మత్స్యకారుల జీవనభృతికి ఆకతాయి సందర్శికులు విఘాతం కలిగిస్తే వెంటనే పోలీసులు చర్యలు తీసుకోవాలని ఆదేశించారు

జిల్లా ఎస్పీ అద్నాన్ నయీం అస్మి మాట్లాడుతూ మాట్లాడుతా బీచ్ సందర్శకులు పోలీస్ హెచ్చరికలను తూచా తప్పక పాటించాలని తెలిపారు. మద్యం సేవించి ఎవరు బీచ్ లోనికి వెళ్ళవద్దని సూచించారు. మత్స్యకారులకు ఇబ్బంది కలిగించే చర్యలను ఎట్టి పరిస్థితుల్లో ఉపేక్షించేది లేదని హెచ్చరించారు.

ఈ సమావేశంలో విశాఖపట్నం కోస్టల్ సెక్యూరిటీ పోలీస్ డిఎస్పి జి.బాలిరెడ్డి, అంతర్వేది మెరైన్ ఇన్స్పెక్టర్ నవీన్ నరసింహమూర్తి, కాకినాడ సూపరింటెండెంట్ ఆఫ్ కస్టమ్స్ కే హెచ్ ఎస్ ఆర్ షైన్ కుమార్, మచిలీపట్నం పోర్టు కన్జర్వేటర్ ఆర్.వెంకటేశ్వరరావు, ఫారెస్ట్ రేంజర్ ఎం.కరుణాకర్, ఏలూరు ఇంటిలిజెన్సీ బ్యూరో ఎసిఐఓ-1 వేణు కళ్యాణ్, కాకినాడ ఐసిజిఎస్ దివాకరన్, మత్స్యశాఖ ఏడి ప్రసాదరావు, తదితరులు పాల్గొన్నారు.