పకృతి సాగుతో పండించిన కూరగాయలను అందించడం ద్వారా ప్రజలకు రుచికరమైన ఆహారాన్ని అందించడంతోపాటు, పరోక్షంగా ప్రజల జీవన ప్రమాణాలు మెరుగుదలకు అధికారులు కృషి చేయాలని జిల్లా కలెక్టర్ చదలవాడ నాగరాణి తెలిపారు.

శుక్రవారం భీమవరం కలెక్టరేట్ ఛాంబర్ నందు జిల్లా కలెక్టర్ చదలవాడ నాగరాణి వ్యవసాయ, డి ఆర్ డి ఏ, కె వి కె అధికారులతో సమావేశమై పకృతి వ్యవసాయం ద్వారా పండించిన కూరగాయలు వినియోగములోనికి తీసుకురావడంపై సమీక్షించారు. ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ ఒకప్పుడు సాంప్రదాయ వ్యవసాయం ద్వారా పండించిన రుచికరమైన, మేలైన కూరగాయలను వినియోగించేవారమని, ప్రస్తుత పరిస్థితులలో అధిక పురుగుమందులు, ఎరువులు వాడిన రుచిలేని కూరగాయలను మాత్రమే వినియోగించాల్సిన పరిస్థితి ఏర్పడిందన్నారు. దీని ద్వారా చిన్న వయసులోనే కిడ్నీలు, క్యాన్సర్ తదితర వ్యాధులకు గురి అవుతున్నారని శాస్త్రీయంగా ప్రకటించడం జరిగిందన్నారు. దీనిని దృష్టిలో ఉంచుకొని వ్యవసాయ, కెవికె, డిఆర్డిఏ అధికారులు జిల్లా ప్రజలకు ఆరోగ్యవంతమైన, రుచికరంగా ఉండే ప్రకృతి సాగు ద్వారా పండించిన కూరగాయలను ప్రజలకు అందించడానికి తమ వంతు కృషి చేయాలని ఆదేశించారు. పకృతి సాగు రైతులకు మంచి ధర లభించడంతోపాటు ప్రజలకు ఆరోగ్యవంతమైన కూరగాయలను అందించవచ్చు అని, అలాగే రైతులకు వినియోగదారులకు మధ్య వ్యాపారులు లేని కారణంగా తక్కువ ధరకు కూరగాయలు కూడా లభిస్తాయని తెలిపారు. ప్రకృతి సాగు కూరగాయలను అందించేందుకు తొలి దశలో విస్సాకోడేరు వంతెన డౌన్ లో కుటీరలను డి ఆర్ డి ఏ ద్వారా ఏర్పాటు చేయడం జరుగుచున్నదని, డ్వాక్రా మహిళల ద్వారా కూరగాయల అమ్మకాలను త్వరలో చేపట్టనున్నట్లు వెల్లడించారు. ప్రకృతి వ్యవసాయం ఉత్పత్తులను రైతుల నుండి సేకరించి డ్వాక్రా మహిళలకు అందించేందుకు వ్యవసాయ శాఖ అధికారులు తగు చర్యలు తీసుకోవాలన్నారు. అలాగే తణుకు, తాడేపల్లిగూడెం ప్రాంతాలతో పాటు ఉండి నియోజకవర్గంలో ప్రకృతి సాగు కూరగాయల దుకాణాల ఏర్పాటుకు చర్యలు తీసుకోవాలని డిఆర్డిఏ అధికారిని ఆదేశించారు.

రేపు అక్టోబర్ 11వ తేదీన భారత ప్రధాని నరేంద్ర మోడీ వర్చువల్ గా ప్రారంభించనున్న “ప్రధానమంత్రి ధన ధాన్య క్రిషి యోజన” పథకం కార్యక్రమం ఏర్పాట్లపై సమీక్షించారు. రేపు ఈ కార్యక్రమాన్ని ఉండి కృషి విజ్ఞాన కేంద్రంలో ఏర్పాటు చేయడం జరిగిందన్నారు.

గుర్రపు డెక్కతో వర్మి కంపోస్ట్ తయారీపై సమీక్షించారు. జిల్లాలో ఎస్ హెచ్ జి మహిళలు ద్వారా మూడు గుర్రపు డెక్క ద్వారా వర్మి కంపోస్ట్ తయారీ కేంద్రాలను ప్రారంభించి కంపోస్ట్ అమ్మకాలు చేపట్టడం జరిగిందని, నరసాపురం ప్రాంతంలో మరో మూడు కేంద్రాలను ఏర్పాటు చేసి కంపోస్ట్ తయారీ ప్రారంభించడం జరిగిందని తెలిపారు. ప్రతి మండలంలో ఎస్ హెచ్ జి మహిళల ద్వారా మూడు గుర్రపుడెక్క కంపోస్ట్ తయారీ కేంద్రాలను ప్రారంభించడానికి చర్యలు తీసుకోవాలని డిఆర్డిఏ ప్రాజెక్టు డైరెక్టర్ ను ఆదేశించారు.

ఈ సమావేశంలో జిల్లా వ్యవసాయ శాఖ అధికారి జడ్.వెంకటేశ్వరరావు, డి.ఆర్.డి.ఏ ప్రాజెక్ట్ డైరెక్టర్ ఎంఎస్ఎస్ వేణుగోపాల్, కె వి కె సైంటిస్టులు ఏ.శ్రీనివాస్, డేబోరా, పకృతి వ్యవసాయం నూకరాజు పాల్గొన్నారు.