జిల్లా సమగ్ర అభివృద్ధికి నూతన పెట్టుబడిదారులను ఆకర్షించేందుకు అధికారులు ప్రణాళికలు సిద్ధం చేయాలి–జాయింట్ కలెక్టర్ టి రాహుల్ కుమార్ రెడ్డి

కలెక్టరేట్ వశిష్ట సమావేశ మందిరంలో శనివారం జిల్లా జాయింట్ కలెక్టర్ టి.రాహుల్ కుమార్ రెడ్డి అధ్యక్షతన జిల్లా అధికారులతో పెట్టుబడులు.. సమన్వయ సమావేశం నిర్వహించడం జరిగింది. ఈ సందర్భంగా ఆయన మాట్లాడుతూ పరిశ్రమలు, టూరిజం, వ్యవసాయ అనుబంధ రంగాలు, ఆక్వా రంగాలలో నూతన వరవడులు గుర్తించి ప్రైవేటు పెట్టుబడులు ఆకర్షించేలా జిల్లా అభివృద్ధికి తోడ్పడాలని జిల్లా జాయింట్ కలెక్టర్ టి.రాహుల్ కుమార్ రెడ్డి అధికారులను కోరారు. జిల్లా అభివృద్ధికి అధికారులు సూచనలు, నూతన ఆలోచనలతో ముందుకు రావాలన్నారు. ఈ మేరకు ప్రైవేటు పెట్టుబడిదారులను ఆహ్వానించి ప్రభుత్వం నుండి వారికి కావలసిన సౌకర్యాలు, సహాయం అందించడం కోసం వారితో పెద్ద ఎత్తున ఈ నెలాఖరులోగా సమావేశం ఏర్పాటు చేయడానికి ప్రతిపాదన సిద్ధం చేయాలని అధికారులు ఆదేశించారు. తాడేపల్లిగూడెంలో ఊక నుండి రైస్ బ్రౌన్ ఆయిల్, సిలికాన్ జెల్, ఫుడ్ ప్రాసెసింగ్ లో చిన్న చిన్న పరికరాల తయారీపై దృష్టి పెట్టాలన్నారు. పశ్చిమగోదావరి జిల్లాలో 19 కిలోమీటర్లు తీర ప్రాంతంలో అయోధ్య లంక నుండి నరసాపురం వరకు ఉన్న గోదావరి నది తీరాన్ని ఆధారంగా చేసుకుని పెద్ద ఎత్తున రిసార్ట్స్, చిన్నచిన్న కాటేజీలు ఏర్పాటుకు పరిశీలించాలన్నారు. లేసు ఉత్పత్తులు ప్రోత్సహించే విధంగా పెట్టుబడులు ఆకర్షించేలా తగు చర్యలు చేపట్టాలని జిల్లా టూరిజం అధికారి ఏ.వి.అప్పారావును ఆదేశించారు. వ్యవసాయ శాఖలో వ్యవసాయ క్షేత్రాలలో కాటేజీలు, ఓపెన్ రిసార్ట్స్ నెలకొల్పేలా వ్యవసాయ శాఖ అధికారులు పరిశీలించాలని జాయింట్ కలెక్టర్ టి. రాహుల్ కుమార్ రెడ్డి సూచించారు.

ఈ సమావేశంలో డిఆర్ఓ బి. శివ నారాయణ రెడ్డి,జిల్లా టూరిజం అధికారి ఏవి అప్పారావు, డిపిఓ ఎం.రామనాథరెడ్డి, జిల్లా వ్యవసాయ శాఖ అధికారి జెడ్.వెంకటేశ్వరరావు, జిల్లా పరిశ్రమల శాఖ అధికారి యు.మంగపతి రావు, ఎల్ డి ఎం ఎ.నాగేంద్రప్రసాద్, గ్రామ,వార్డు సచివాలయ అధికారి వై.దోసి రెడ్డి, జిల్లా చేనేత శాఖాధికారి కె.అప్పారావు, జిల్లా కార్మిక శాఖ అధికారి ఆకన లక్ష్మి, తదితర అధికారులు పాల్గొన్నారు.