జిఎస్టి స్లాబ్ రెట్లు తగ్గింపుతో వినియోగదారునికి మరింత ఊతం లభించినట్లు అయింది–జిల్లా కలెక్టర్ చదలవాడ నాగరాణి

జీఎస్టీ తగ్గింపు పై చివరి వ్యక్తి వరకు అవగాహన కల్పించాలి

సూపర్ జిఎస్టి – సూపర్ సేవింగ్స్ కార్యక్రమంలో భాగంగా శుక్రవారం జిల్లా కలెక్టరేట్ ప్రాంగణంలో సోనో విజన్, స్టార్ విజన్, రిలయన్స్ డిజిటల్, వై నాట్ ఎలక్ట్రికల్ ప్రైవేట్ లిమిటెడ్, ఇన్నోవేషన్ షాపింగ్, బజాజ్ ఎలక్ట్రానిక్స్, సత్య ఎలక్ట్రానిక్స్ తదితరు కంపెనీలు ఎలక్ట్రానిక్ ఉత్పత్తుల ప్రదర్శనను జిల్లా కలెక్టర్ చదలవాడ నాగరాణి ప్రారంభించి, జీఎస్టీ రేట్ల తగ్గింపును పరిశీలించారు. ఎలక్ట్రానిక్స్ గూడ్స్ పై జిఎస్టి తగ్గింపునకు ముందు ప్రస్తుతం ఉన్న ధరలు గురించి వివరాలను అడిగి తెలుసుకున్నారు. సేల్స్ ఏ విధముగా ఉన్నాయి, గతంలో కన్నా పెరిగినవా, లేవా అని షాపు నిర్వాహకులను అడిగి తెలుసుకున్నారు. ఎలక్ట్రానిక్ ఉత్పత్తులపై కేంద్ర ప్రభుత్వం జీఎస్టీ స్లాబ్ ను 28 శాతం నుండి 18 శాతానికి మదింపు చేయడంతో పలు ఎలక్ట్రానిక్ వస్తువులు ధరలు తగ్గాయని, ప్రధానంగా ఎయిర్ కండిషనర్లు, డిష్ వాష్ లు, 40 ఇంచెస్ సైజ్ పైబడిన ఎల్.ఈ.డి టీవీలు రేట్లు సుమారు 5 వేల రూపాయలకు పైబడి తగ్గాయని నిర్వాహకులు తెలిపారు.

ఈ సందర్భంగా జిల్లా కలెక్టర్ చదలవాడ నాగరాణి మాట్లాడుతూ కేంద్ర ప్రభుత్వం తీసుకువచ్చిన జీఎస్టి 2.0 సంస్కరణలపై చివరి వ్యక్తి వరకు అవగాహన కల్పించాలన్నారు. సామాన్యులలో కొనుగోలు సామర్థ్యం పెంచాలనే లక్ష్యంతో, సామాన్య ప్రజలకి దరలు అందుబాటులో ఉంచేందుకు జీఎస్టీ 2.0ను అమల్లోకి తీసుకువచ్చిందని పేర్కొన్నారు. ప్రతీ ఒక్కరూ, ప్రతీ రోజు గృహ అవసరాలకు సంబంధించిన వస్తువులను కొనుగోలు చేస్తూనే ఉంటారన్నారు. టూత్ పేస్ట్ నుంచి బెంజ్ కారు వరకు ప్రతి ఒక్క దాని పైన జీఎస్టీ ఉంటుందన్నారు. కొన్ని పథకాలు అర్హులకు మాత్రమే లబ్ది చేకూరుతుందని, కానీ ఈ జీఎస్టీ 2.0 ద్వారా ప్రతీ ఒక్కరికి లబ్ది చేకూరుతుందన్నారు. సుమారు గత 15 రోజుల నుండి గ్రామాల్లో జీఎస్టీ 2.0 పై పలు వస్తువులపై అవగాహన కార్యక్రమాలు చేపట్టడం జరుగుతుందన్నారు. ప్రజల్లో అవగాహన కల్పించడం ద్వారా కొనుగోలు చేసే సమయంలో ప్రశ్నించేతత్వం వస్తుందన్నారు. జనజాగృతి మేళాలు నిర్వహించి ప్రజలకు అవగాహన కల్పించడంలో ఉత్సాహంగా పాల్గొన్న వారికి ధన్యవాదాలు తెలిపారు. కొనుగోలు చేసిన సామాగ్రిపై పాత ధర ఉంటుందని, దానిపై మీకు డిస్కౌంట్ ఇస్తే అది డిస్కౌంట్ ఇచ్చినట్లు ఉంటోందని, కానీ ప్రభుత్వం అందిస్తున్న జీఎస్టి రేట్ తగ్గించడం వల్ల వచ్చిన డిస్కౌంట్ లాగా ఉండదన్నారు. అందుకు ప్రతీ ఉత్పత్తి పై నూతన జీఎస్టీ తరువాత ధరలను స్టిక్కరింగ్ చేయాలన్నారు. ప్రజలకి లబ్ది చేకూరేలా ఈ కార్యక్రమాన్ని రూపొందించడం జరిగిందని వారికి అర్థమైయేలా వివరించాలన్నారు. జిఎస్టీ 2.0 ద్వారా వచ్చే లాభాన్ని చివరి వ్యక్తి వరకూ తీసుకొని వెళ్లినట్లయితే మనం విజయం సాధించినట్లేనని అన్నారు.

ఈ కార్యక్రమంలో డిఆర్ఓ బి.శివన్నారాయణ రెడ్డి, వాణిజ్య పన్నుల శాఖ డెప్యూటీ కమిషనర్ కె.పి.శైలజ, జీఎస్టీ అసిస్టెంట్ కమిషనర్ కేదారేశ్వరరావు, జిల్లా వ్యవసాయ శాఖ అధికారి జెడ్.వెంకటేశ్వరరావు, సోనో విజన్, స్టార్ విజన్, రిలయన్స్ డిజిటల్, వై నాట్ ఎలక్ట్రికల్ ప్రైవేట్ లిమిటెడ్, ఇన్నోవేషన్ షాపింగ్, బజాజ్ ఎలక్ట్రానిక్స్, సత్య ఎలక్ట్రానిక్స్ తదితరు కంపెనీల నిర్వాహకులు ఎం.రాఘవేంద్రబాబు, దాసరి బాల శ్రీధర్, రాంబాబు, జి.వెంకట సత్యనారాయణ, కే ప్రభాకర్ రావు, యు.హరి వెంకటేష్, తదితరులు పాల్గొన్నారు.