అధికారులు క్షేత్రస్థాయిలో పర్యటించి సమస్యలను పరిష్కరించాలి–జిల్లా కలెక్టర్ చదలవాడ నాగరాణి

పిజిఆర్ఎస్ లో అందిన అర్జీలను అధికారులు క్షుణ్ణంగా పరిశీలించి శాశ్వత పరిష్కారం చూపాలి.

సోమవారం జిల్లా కలెక్టరేట్ పిజిఆర్ఎస్ సమావేశ మందిరంలో జిల్లా కలెక్టర్ చదలవాడ నాగరాణి తో పాటు జాయింట్ కలెక్టర్ టి. రాహుల్ కుమార్ రెడ్డి, డిఆర్ఓ బి.శివన్నారాయణ రెడ్డి, డ్వామా పిడి డా.కెసిహెచ్ అప్పారావు, జిల్లా వ్యవసాయ శాఖ అధికారి జెడ్. వెంకటేశ్వరరావు, జిల్లా సర్వే అధికారి కె.జాషువా జిల్లాలో పలు ప్రాంతాల నుండి వచ్చిన ప్రజల నుండి ఫిర్యాదులను స్వీకరించారు. ఈరోజు వివిధ సమస్యల పరిష్కారానికి ప్రజలనుంచి 95 అర్జీలు అందాయి.

ఈ సందర్భంగా జిల్లా కలెక్టర్ మాట్లాడుతూ ప్రజా ఫిర్యాదుల పరిష్కారంపై ప్రభుత్వం ప్రత్యేక దృష్టి పెట్టిందని, పిజిఆర్ఎస్ లో ప్రజలు సమర్పించిన అర్జీల పరిష్కారానికి అధికారులు ప్రత్యేక శ్రద్ధ తీసుకోవాలని అధికారులను ఆదేశించారు. అధికారులు క్షేత్రస్థాయిలో ఫిర్యాదుదారులతో స్వయంగా మాట్లాడి నాణ్యమైన పరిష్కారాన్ని చూపాలన్నారు. శాఖల వారీగా వచ్చిన అర్జీలను పరిశీలించి తక్షణమే పరిష్కార చర్యలు చేపట్టాలన్నారు. అర్జీల పరిష్కారంలో బాధ్యతాయుతంగా వ్యవహరించాలని, నిర్లక్ష్యానికి తావు లేకుండా అధికారులు సమిష్టిగా పనిచేయాలని సూచించారు. అర్జీలు రీఓపెన్‌కు ఆస్కారం లేకుండా చూడాలన్నారు.

ఈరోజు పిజిఆర్ఎస్ కు అందిన ఫిర్యాదులలో ముఖ్యమైనవి కొన్ని ఈ విధంగా ఉన్నాయి.

భీమవరం మండలం పెదగరుకు చెందిన పాలపర్తి జాన్ కెనడి అర్జీని సమర్పిస్తూ, తమ గ్రామంలో ఇళ్ల సరిహద్దులకు చేర్చి చేపలు, రొయ్యలు చెరువులు తవ్వుతున్నారని వారికి ఏ విధమైన అనుమతులు లేవన్నారు. దీనివల్ల మా ఇళ్లకు తీవ్ర నష్టం జరుగుతుందని,ప్రశ్నిస్తే భౌతిక దాడులు, కేసులు పెడుతున్నారని కావున చేపలు, రొయ్యలు చెరువులు సాగు చేయకుండా చర్యలు తీసుకొని తమకు న్యాయం చేయాలని కోరారు.

అత్తిలి మండలం, ఈడూరు గ్రామానికి చెందిన కోడె రాంపండు అర్జీని సమర్థిస్తూ, తనకు 1.30 సెంట్ల భూమి ఉందని రీసర్వేలో 1.14 సెంట్లు మాత్రమే చూపిస్తున్నదని, 16 సెంట్లు భూమి పక్క భూమిలో కలిసిందని తిరిగి సర్వే చేసి తగ్గిన 16 సెంట్లు భూమి ఇప్పించాలని కోరారు.

పెనుగొండ గ్రామానికి చెందిన దేవ గుప్తాపు లక్ష్మి అర్జీని సమర్పిస్తూ, తన భర్త 2023లో చనిపోయారని తనకు ఎటువంటి ఆదాయము లేదని, జీవనం కష్టంగా ఉందని, దయచేసి వితంతుపించను మంజూరు చేయాలని కోరారు.

గణపవరం మండలం కోమట్ల పాలెం గ్రామానికి చెందిన పిట్టా సుబ్బారావు తన ఇంటి స్థలాన్ని పక్కన ఉన్నవారు ఆక్రమించుకున్నారని సర్వే చేసి హద్దులు గుర్తించి తన స్థలాన్ని తనకు ఇప్పించాలని అర్జీని సమర్పించారు.

ఇరగవరం మండలం అర్జునుడు పాలెంనకు చెందిన తిరువోలు కుమారి తాను ఫైలేరియా వ్యాధి వలన నడవడానికి చాలా ఇబ్బంది పడుతున్నానని, జీవనాధారం లేదని దయచేసి పింఛను మంజూరు చేయాలని అర్జీని సమర్పించారు.

తణుకు మండలం దువ్వ గ్రామానికి చెందిన పుట్లూరి రాధా వినతి పత్రం సమర్పిస్తూ, తనకు 2001 సంవత్సరంలో ఇంటి పట్టా ఇచ్చారని, చుట్టుపక్కల వారు ఇంటి స్థలాన్ని ఆక్రమించుకున్నారని దయచేసి నా స్థలానికి హద్దులు చూపించి, తనకు అప్పగించాలని కోరారు.

ఈ సందర్భంగా పీజీ ఆర్ఎస్ హాలు వెలుపల ప్రత్యేకంగా ఏర్పాటు చేసిన అర్జీదారుల సమస్యల రిజిస్ట్రేషన్ ప్రక్రియ ఏ విధంగా జరుగుతున్నది జిల్లా కలెక్టర్ చదలవాడ నాగరాణి పరిశీలించారు. అర్జీదారుల సమస్యల రిజిస్ట్రేషన్ సమయంలో డేటా నమోదులో ప్రత్యేక శ్రద్ధ తీసుకోవాలని సిబ్బందికి సూచించారు.

అనంతరం ఇండియన్ రెడ్ క్రాస్ సొసైటీ ఆధ్వర్యంలో ప్రతి సోమవారం ఉదయం పి జి ఆర్ ఎస్ అర్జీదారులకు అందించే అల్పాహారాన్ని పరిశీలించారు. దూర ప్రాంతాల నుండి కలెక్టర్ కార్యాలయానికి ప్రతి సోమవారం వచ్చే అర్జీదారులకు ఉదయం అల్పాహారం, మధ్యాహ్నం భోజన ఏర్పాట్లు చేయడం పట్ల అర్జీదారులు తమ సంతోషాన్ని వ్యక్తం చేశారు.

ఈ సమావేశంలో వివిధ శాఖల జిల్లా అధికారులు, వయోవృద్ధుల సంక్షేమ ట్రిపునల్ సభ్యులు మేళం దుర్గాప్రసాద్ తదితరులు పాల్గొన్నారు.